馬爾大夫又有好介紹
唔知喺大家心目中，去馬爾代夫旅遊係咪只有陽光海灘海浪聲呢？的確大部分人去馬爾代夫都係想入住一間高級酒店，放鬆心情靜靜享受假期，有冇諗過原來馬爾代夫都有休閒娛樂綜合設施，可以俾一家人或朋友一齊shopping行吓玩吓呢？
由泰國啤酒品牌集團Singha Estate 打造嘅馬爾代夫首個綜合休閒娛樂設施CROSSROADS 於2019年初正式開幕，座落於Kaafa Atoll與Emboodhoo Lagoon，距離馬累機場只有15分鐘船程！
CROSSROADS暫時係由3個以木板步橋嘅島嶼組成，中心點The Marina係娛樂消閒集中地，裡面有齊世界聞名嘅餐廳同可以血拼嘅潮店，仲有Marine Discovery Centre, Maldives Discovery Centre, Watersports and Dive Centre及Junior Beach Club and Camp，另外兩個島就係兩間渡假酒店嘅所在地，酒店嘅水上活動都係到The Marina呢邊嘅Watersports and Dive Centre進行，要來回The Marina及酒店只需經過木板橋就可以，非常方便！
CROSSROADS而家只係開咗幕大半年，將來整個項目一共會有9間酒店及50間餐廳，仲有超過11000平方米嘅購物空間，有著馬爾代夫其他地區未有嘅獨特賣點。
今次我主要為大家介紹一下CROSSROADS嘅兩間酒店：SAii Lagoon及Hard Rock Hotel
SAii Lagoon
SAii Lagoon係Hilton集團旗下酒店，希望到訪嘅夫婦愛侶，家庭及三五知己可以喺度享受一個歡樂無窮，舒適自在嘅印度洋假期。酒店一共擁有198間客房，最基本嘅房間係Beach Room及Sky Room，各有76間，兩種客房都係480呎，以色彩佈置點綴，甚有葡國殖民地色彩嘅泰國風格，兩者分別在於分佈樓層，Beach Room喺下層，Sky Room係上層。
除咗基本房間，當然亦有Beach Villa及Water Villa。
Beach Villa一共20間，面積650呎，裝飾佈置與客房大同小異，最特別係設有浴缸喺淋浴間對出嘅露天位置，四邊都有牆圍住，好有中東風情。
Overwater Villa面積900呎，房間佈置跟其他種類房間都係差唔多，不過寬敞得多，浴室有兩個洗手盆及淋浴間，浴缸放咗喺露台，浴缸前面就係水上網床，露台雖然唔大，但有太陽椅及網床，要曬太陽嘆世界絕對足夠！
如果一家大細嚟渡假，仲可以入住可容納4個大人加2個小朋友嘅2-bedroom Beach Villa 及2-bedroom Overwater Pool Villa，後者有2600呎，設有私人泳池及兩個網床，空間十足。
SAii Lagoon嘅水上玩樂設施及餐廳都係The Marina嘅島上，有關餐飲服務最後我會詳細介紹????酒店島上都有自己一個主泳池，pool side bar及gym room。
不得不提，SAii Lagoon仲有一個幾特別嘅服務”signature MIY @ Aroma Lab”，客人可以到Aroma Lab調配自己鍾意嘅浴室用品味道，我都調配咗一支，用起嚟感覺份外親切。
Hard Rock Hotel
大家對Hard Rock Hotel都唔會陌生，佢哋於2019年3月開始係馬爾代夫紮根，酒店設計充滿熱帶時尚感覺，由建築設計就已經感受到呢度嘅歡樂氣氛。一到達check-in，職員已經提醒我哋記得到Rock Shop揀返對自己喜歡顏色嘅拖鞋，心情立刻進入渡假mode????全酒店有198間客房，分為silver，gold及plantium三級，silver係最基本房間嘅級數，裡面分Beach Studio，Sky Studio及Family Suite。
Silver Beach Studio面積約500呎，位於地下直達沙灘，房內佈置簡約舒適，有海景私人露台及室內室外淋浴間，Beach Studio上層就係內部設計一模一樣嘅Silver Sky Studio，不過當然冇室外淋浴間及唔可以直達沙灘啦。
兩層嘅Silver Family Suite面積約有1100呎，下層設king size bed，上層就有張可以瞓3個小朋友嘅子母上下格床，最多可容納4個大人及2個小童，如果入住3晚或以上，酒店仲會附送8小時保母服務，幫客人照顧一下小朋友俾D時間父母自己享受一下。
高一級嘅客房類型Gold Beach Villa比Silver嘅客房大D，有6700呎，villa一行出去就係沙灘，沙灘上當然擺放咗太陽椅，如果入住3晚或以上，客人仲可以於自己villa前免費享用一次燒烤晚餐。
酒店最高級客房類型Plantium Overwater Villa及Overwater Pool Villa 面積約有800呎，分別有37間，前者設有網床，後者就有網床，水上屋當然可以直接由露台跳入印度洋啦！
一家大細四大兩小，最適合入住兩房嘅Rock Royalty Overwater Pool Villa，呢間villa有一個露天客廳、網床及私人泳池。
Hard Rock客房佈置時尚休閒，酒店所有活動資訊都可以喺電視上睇到，電影亦可選中文字幕???????? 客房除咗傢具擺設加入咗音樂元素，連空氣都瀰漫住跳動旋律嘅氣息，客人在check-in時可以得到一個download code，從播放清單中下載自己喜歡嘅音樂於房間內播放；如果你係音樂愛好分子，仲可以向酒店免費借用Fender電結他及耳機返房jam吓歌，房間內亦設有黑膠唱片轉盤俾你慢慢嘆音樂⋯去到馬爾代夫咁遠都可以享受音樂帶俾自己嘅歡樂，真係只有Hard Rock先做得到????
Hard Rock嘅Rock Spa同其他酒店嘅spa都有D唔同，spa room位於沙灘上，會隨著音樂振動嘅按摩床上方擺放咗特別嘅罩杯形喇叭，招牌療程Rhythm and Motion嘅技師會跟住音樂節拍按摩，希望客人可以回復活力，精神煥發再去探索馬爾代夫。Rock Om係Hard Rock酒店嘅瑜珈課程，配合音樂節奏及四周寧靜環境，幫助客人平靜身心。Body Rock Fitness Centre位於海濱，設有最先進器材，想玩吓練吓都可以。
除此之外，呢度仲有大受大人小朋友歡迎嘅Hard Rock Roxity Kids Club &Teen Spirit Club！小朋友嚟到跟住The Roxtars團隊玩盡各室內室外活動，沙灘泳池活動當然唔少得，最特別就係有結他電子琴等音樂班俾小朋友玩吓，爸爸媽媽可以放心到Rock Shop買吓馬爾代夫限定紀念品，自由自在輕鬆一下。
水上活動方面都係要到The Marina嗰邊參加，不過Hard Rock酒店有設滑梯及pool side bar嘅主島泳池，游水都好方便。
SAii Lagoon及Hard Rock酒店內各有自己嘅餐廳，另外仲有D餐廳喺The Marina嘅島上，如果買嘅套餐只包於自己入住嘅酒店享用早餐，住客可以自費到CROSSROADS嘅任何一間餐廳用餐；如果係買half-board package（包早晚餐）就可以免費到以下5間餐廳食晚餐：
1）位於SAii Lagoon嘅Miss Olive Oyl主打地中海式海鮮及美味烤焗菜式，現場鐵板燒味道都可以，雖然食物種類唔多但新鮮，每日嘅主菜都會唔同，我哋試過晚餐，10分滿分都有8分。
2）Mr Tomyam亦係喺SAii Lagoon內，供應泰國意大利fusion菜，露天區域位於沙灘上，客人可以放鬆享用午餐，位於星空下嘅晚餐亦份外醉人。我哋喺度食咗一餐3-course menu嘅晚餐，餐廳可以俾客人從頭盤主菜甜品點任何三款食物，無限制頭盤主菜甜品每樣各一款，食物味道都唔錯，有8-8.5分，呢度枱唔多，想嚟食記得早D預約。
3）Hard Rock Hotel內嘅主餐廳Sessions提供現代多國菜，我哋兩個人自費嚟食咗4日午餐，食物份量比較少，味道就不過不失啦！
4）The Elephant & The Butterfly係Hard Rock Hotel嘅海濱餐廳及酒吧，主打墨西哥及拉丁美洲菜式，供應午餐及晚餐，餐廳一星期有6天仲有現場音樂，氣氛一流！
5）位於The Marina嘅Hard Rock Cafe固然係美式餐廳，每間客房可以點兩個前菜，一個主菜及一個甜品，食物份量都大所以兩個人都夠食。我哋覺得食物都幾到位，而且環境熱閙，有室內及室外座位，搖滾氣氛令人熱血沸騰，我覺得呢間餐廳有8分！
如果買Full-board package，仲可以喺The Marina嘅額外5間餐廳用膳，可以試盡印度菜、泰國菜，日本菜同一D主題餐廳，喺馬爾代夫無乜其他地方可以試到咁多唔同口味嘅食物，鍾意食嘢嘅朋友一定好開心！
CROSSROADS呢個全馬爾代夫最大嘅休閒娛樂中心，好適合想去馬爾代夫但又怕悶嘅朋友，嚟渡蜜月、慶祝週年紀念或一家大細開心渡假都一定會樂而忘返！
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記