馬爾大夫又有好介紹
1974年已開始業務嘅意大利酒店集團Baglioni Hotels & Resorts喺意大利多個文化城市都有豪華酒店，除咗倫敦外，集團首次進駐意大利以外地區：馬爾代夫！
Baglioni Resort Maldives於2019年9月先剛開幕，我哋第一時間過嚟感受一下意大利式奢華。Baglioni位於Dhaalu Atoll上嘅Maagau島，從馬累坐水上飛機過嚟需要40分鐘，Maagau係一個小型天然小島，島上少於5%係經過人工修飾，沙灘嘅沙又細又滑，園林景色好自然，最適合靜靜休息渡假。
我哋喺馬累等上水上飛機時，職員已經喺lounge度幫我哋做咗check-in手續，所以我哋一到埗就可以直接入房啦！
我哋今次入住水上屋Water Villa，另外仲有Sunset Water Villa及Pool Water Villa會喺2020年1月先會啟用。
Water Villas一共有17間，全間villa面積有1130呎，當中大約有500呎係戶外露台，房間設計簡潔舒適，奢華而且高雅，樓底高所以空間感十足；
露台最出部分低咗兩級，擺放咗太陽椅，旁邊就係落海嘅樓梯。
Baglioni一向注重意大利文化藝術及生活品味，呢間喺馬爾代夫嘅酒店都唔例外，房間內嘅所有浴室用品、冰桶甚至煙灰缸都係自己品牌，每位入住嘅客人更會收到一支法拉利香檳，非常特別！
Sunset Water Villa就有16間，跟Water Villas設計一樣，不過所處位置可以欣賞到日落。
一家老細嚟渡假，有小朋友就比較適合住沙灘屋，附設泳池嘅Pool Grand Beach Villa及Pool Suite Beach Villa就最啱小朋友，因為呢兩間villa都有一定範圍嘅私人沙灘。
Pool Grand Beach Villa約1300呎，可入住2大2小，擁有一個私人泳池及涼亭；Pool Suite Beach Villa有1800呎左右，可入住2大2小，室內有寬敞客廳，室外沙灘位置亦有休息梳化。如果兩個人想簡簡單單休息，唔需要有泳池或沙灘，可以揀園林景嘅Garden Villa。
Baglioni因為位於一個天然島上，四周水質都非常清澈，珊瑚礁豐富唔在講，我仲見到有墨魚，即係代表水質確係高！Maagau Dive Centre提供一切探索海洋活動，深潛浮潛黃昏潛、海豚追蹤，浪漫遊船觀賞星空⋯酒店內有主泳池，當然亦有免費非摩打水上活動提供。
女士喜歡嘅Spa提供真正意大利身心享受，裡面有個設施齊備嘅gym room，小朋友當然唔可以錯過專為3-12歲客人而設嘅kids club????????
意大利文化注重生活品味，意大利廚師對食有非常高嘅要求，所以Baglioni嘅餐飲質素好高，以海鮮最出色，三間餐廳加一間pool bar，令Baglioni嘅餐飲服務成為酒店最大賣點，對食特別講究嘅朋友一定會滿意！
主餐廳Taste供應多國美食自助早晚餐，我哋住三日每日都去食早餐，食物款式唔多但高質，我三日都點咗美味得令人食過番尋味嘅egg benedict！
自助晚餐有鐵板燒，牛扒鮮蝦帶子都新鮮美味，無乜挑剔。
日本餐廳Umami建於jetty上，係一間水上餐廳，開揚海景舒服得令人食指大動。Setlunch有3個course，我哋試過壽司、魚生，串燒，所有味道令人滿意。
意大利餐廳Gusto位於2樓，地下係pool bar，整楝餐廳燈光設計效果好好，氣氛浪漫，最適合星空浪漫晚餐。一般客人會食三道菜嘅晚餐，我叫嘅主菜黑松露意粉本身menu係無嘅，因為我好想食所以試試問吓廚師整唔整到，廚師亦好細心周到，專登叫人出嚟問一問我需唔需要加D材料，結果整碟意粉我都十分滿意；我同事亦點咗侍應介紹嘅石斑魚，都係好好味，最後嘅甜品tiramisu亦係出色！呢餐飯我會俾10分，因為無論食物定環境都令人回味無窮！
Gusto下層嘅pool bar亦係一個享受陽光，欣賞夕陽與美食嘅好地方，呢度有沙律pizza意粉供應，pizza menu內有好多選擇，Regional Director 推介我哋試salami pizza，上面除咗有沙樂美腸仲有parma ham，成個pizza有2呎x2呎咁大，仲要只係US30，喺香港一定食唔到！另外我哋都試咗牛扒，菠菜feta cheese salad及caesar salad，牛扒淋滑多汁肉味濃郁，而salad就份量十足，味道都好出色！
如果嚟馬爾代夫想喺充滿意大利風情嘅環境靜靜休息同享受美食，Baglioni係一個好好嘅選擇，而且性價比高，總括嚟講都有8.5分，待酒店所有房間都啟用後，相信酒店運作更暢順，服務更好！
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記