馬爾大夫又有好介紹
大部分人都認為馬爾代夫只係一個蜜月旅行目的地，得個海同間villa，無其他觀光景點同外出活動，幾日都只係困住喺間酒店度好悶⋯⋯如果你係咁諗，可能你對馬爾代夫嘅認識實在太表面喇～事實上，馬爾代夫個海精彩絕倫，而且近年越來越多適合三五知己及一家大細歡聚嘅酒店，好適合想帶埋年幼仔女或者幾對couples一齊嚟享受小島假期！
於2018年暑假新開嘅Emerald Maldives Resort & Spa就係其中一間，呢間意大利集團酒店提供五星豪華全包套餐，佢亦係The Leading Hotels of the World成員之一，設施服務都無得頂，今次我同三位同事一齊到訪，為大家率先介紹一下。
Emerald Maldives位處馬爾代夫北面嘅Raa Atoll，由馬累入島要坐40分鐘水上飛機或者35分鐘內陸機再轉15分鐘快艇。全島面積有20公頃，被1.5公里嘅細白沙灘包圍，屬於一個大型島。酒店擁有124間villa，水上屋及沙灘屋約各佔一半，我哋到訪時酒店開咗業約一年而且係淡季，住客唔多，大概因為島大，所以密度相對低。
首先介紹一下呢度嘅Deluxe All-inclusive Package，好多打算去馬爾代夫嘅客人都擔心當地消費高，到時見到活動或食物昂貴會就住就住，玩得唔盡興，如果入住Emerald呢類型全包式酒店就可以免除呢方面嘅憂慮。一個價錢包括房間、早午晚三餐（所有餐廳）、所有酒類、非摩打推動嘅水上活動，出外海浮潛及一次出海tour如日落巡航及海釣，如果係蜜月遊客人，酒店仲會送60分鐘spa treatment????
Check-in後我哋坐buggy環島一周，親身感受到呢個島有幾大，之後就到我哋今次住嘅Water Villas with Pool（約1800呎）。Villa走現代時尚風格，整個房間係一個正方形，被分割為三部分：睡房、浴室及露台。
大門口喺右下邊，一入去就係以藍白為主色嘅睡房，充滿海洋色彩，大床係房間正中間，睡床直望就係大玻璃趟門可以直出露台；正方形右上就係浴室，面積同睡房一樣大，以白色大理石佈置，風格同房間截然不同，一樣可以從大玻璃趟門出去露台；房間第三部分就係露台，設有5×3米泳池及水上網床，網床特設大cushion俾客人喺度認真瞓個晏覺，夜晚喺mini-bar攞D紅酒白酒出嚟嘆住欣賞星空，嚟馬爾代夫就係咁嘆！
Water Villas with Pool對出海面係游泳區，無乜珊瑚，如果想由villa跳落水就可以浮潛，可以揀Jacuzzi Water Villas，佢嘅間隔同有泳池嘅房一樣，面積細少少，因為2×2米嘅按摩池取代咗泳池。其實房間嘅空間好大，就算帶埋小朋友嚟要加床絕對無問題。
所有villa都配備兩架私人單車方便住客喺島上四圍走，亦特設小型單車俾單車技術稍遜嘅朋友，唔想踩亦可以叫buggy車。我哋之後踩單車去咗參觀Beach Villas with Pool，面積亦係約1800呎，房間係一個橫放嘅長方形，最前面係面向沙灘嘅露台，中間係睡房，後面係浴室。
露台一樣有太陽椅、泳池，行出去就係沙灘，沙灘上另外放咗兩張太陽椅，方便落完海上嚟休息；浴室室內部分設浴缸，室外就係園林式淋浴區。整體嚟講，呢間beach villa都好舒適，有沙灘亦可望到海，圍住villa嘅樹林都有一定高度，所以私隱度都高，唔怕俾鄰房見到。
先前提過all-inclusive package包括酒店所有餐廳嘅食物及酒類，而家介紹一下酒店嘅四間餐廳：
– Aqua係位於沙灘上嘅All-Day Dining主餐廳，供應早午晚自助餐，設室外及室內空調座位，整座餐廳喺馬爾代夫嚟講屬於大型建築，佈置七彩繽紛，氣氛濃厚，服務細心周到，待應充滿笑容，每位都主動為客人拉櫈及拎食物。食物雖然無太大驚喜，但以馬爾代夫旅遊淡季嚟講，酒店開足四間餐廳都已經算唔錯，我哋咁啱撞見香港客一齊用餐，佢哋都對餐飲滿意。
– Beach Club Grill Restaurant ＆ Beach Pool Bar主打海鮮肉類石頭燒，位於沙灘上，可以俾玩完水上活動嘅客人直接嚟用餐，晚上有DJ打碟又有英式桌球及鋼琴俾客人顯身手，氣氛輕鬆隨便，對住個靚景，客人可以放低一切懶洋洋食一餐。餐廳亦有供應pizza意粉等輕食，我哋喺度食咗個lunch，試咗炸魷魚圈、印度咖哩及慢煮蕃茄意粉。
– Amazònico Restaurant 係供應中南美菜式設開放式廚房嘅主題餐廳，以亞馬遜森林設計，半自助形式主打巴西牛肉。
– Le Asiatique Restaurant 專食亞洲菜，以中日風格設計，一邊枱係單點，另一邊係鐵板燒，客人可以一餐試到多國菜式，例如日式前菜，馬拉喇沙餐湯，中式主菜⋯呢度仲有喺馬爾代夫好難先食到嘅泰國香米（一般都係印度米），確實感覺親切。鐵板燒枱只有兩張，又有師父表演手藝，精彩吸引，所以最好早D搵管家幫手安排。
酒店其他設施一應俱全：
– The Emerald Spa以峇里及泰國療法為客人放鬆，有10間園林式房間，設有印尼風情休閒泳池及土耳其浴休息區。整個療程都可以令客人放鬆，技師都親切細心，但係呢類型亞洲風情嘅spa對香港人嚟講太熟悉，所以兩位同行女士都覺得一般，整體不過不失啦！如果嚟渡蜜月，60分鐘spa係免費送嘅，咁其實都係一個bonus，都應該滿意????
– Dolphin Kids Club歡迎4-12歲嘅小客人，呢個超大歡樂天地有15000平方呎，室內室外活動多不勝數，有兒童餐廳、泳池、兒童攀石沿繩下降，仲有適合中童嘅peer sports同有益身心嘅game，小朋友應該會玩到爸爸媽媽去咗邊都唔記得????有需要可以請保母照顧0-3歲幼兒，佢哋甚至可以到房間幫忙照顧，讓父母放鬆一下。
– Gym & Sports Center有 gym room、兩個可變成足球場嘅網球場及兩個paddle court，padel 係一種由意大利引入嘅壁球及網球嘅運動，到訪客人可以試試呢種新玩意。（3v7a2615,2612)
– Diving centre及Water Sports Centre ：因為環繞酒店嘅珊瑚礁唔算好豐富，所以酒店每星期都有兩三次出海浮潛嘅tour，全包套餐已包括浮潛活動，可以預先於Water Sports Centre預約。
Emerald Maldives Resort & Spa可謂一間合家歡嘅酒店，如果你好動又喜歡戶外活動，想同小朋友或三五知己一齊嚟馬爾代夫渡假，Emerald 可算係首選，當然二人嚟蜜月旅行亦十分適合，動靜活動皆有，想擁有一個難忘馬爾代夫假期話咁易！
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記