馬爾大夫又有好介紹
Six Senses呢個酒店名牌，好多喜愛旅遊嘆世界嘅香港人就算未去過都一定聽過。大家可能去過Six Senses喺泰國或越南嘅酒店，但位於馬爾代夫的Six Senses Laamu你又去過未？
今日等我馬爾大夫『聯同』旅遊頻道 Travel Channel Services 來為大家介紹一下呢間喺印度洋嘅靚resort啦！ Six Senses Laamu係Laamu環礁嘅唯一一間resort，要嚟呢度就要首先由香港飛去馬爾代夫的首都馬累，再轉坐20分鐘嘅內陸機及一程15-20分鐘船就可以check in啦！ 你可能會諗＂吓？轉來轉去，我嚟嘆㗎喎？＂ 放心，作為尊貴嘅住客，只要你喺馬累一落機，你就可以咩都唔洗理，等酒店嘅staff嚟接你，之後你只要跟住佢，就會好快去到你間villa㗎啦！
今次我介紹嘅room type喺Laamu Water Villa，到達lobby check in後，要行一段大約8-10分鐘距離嘅路先到達villa，行李當然唔需要我哋自己操心。Resort面積較大，下下咁喺烈日當空要行成10分鐘都有D辛苦，細心嘅酒店已為住客準備好單車，你可以選擇踩單車周圍走，或者直接call管家揸架buggy嚟接送你。
一到達villa門口就已經感受到呢間resort嘅細心！ 門口呢隻小箭豬喺方便住客刷走鞋底嘅沙，唔洗搞到間房成地沙
入到房，無敵海景即現眼前，房間內原始但舒服嘅佈置同眼前嘅無敵海景成為絕配！ 房間係原木裝修設計，感覺清新。
房間嘅洗手間以半開放式設計，設計獨特嘅洗手盤正正喺張大床後面，再行入去先喺如廁嘅地方，辦事時亦可以睇吓有冇魚仔嚟同你say hi!
房間內嘅浴缸係全玻璃設計，一邊浸浴一邊睇魚，彷彿置身大海一樣，相信對我哋香港人嚟講真係一個新體驗。
房間嘅另一邊亦有一個淋浴間，毛巾及沖涼用品齊備，方便住客游完水上來快快沖個靚涼。
房間內嘅床雖然唔係好大，但兩個人瞓都好鬆動，而且面向印度洋，柔和的海浪聲從兩邊玻璃門隨隨透入，一瞓醒張開眼就望見個蔚藍大海，真係乜煩惱都可以拋諸腦後！房內仲有一張單人床，可以攤喺度嘆住冷氣瞓個晏覺或者睇吓書丶放空一下。不過難得嚟到馬爾代夫，梗係唔好嘥咗個太陽，只要推開房內嘅玻璃門，你就可以同陽光玩遊戲啦！
Villa嘅戶外空間好大，一出去就有個梳化位俾你同另一半喺度飲杯嘢丶談吓心，坐梳化嘅時候你仲可以浸吓腳，因為玻璃枱下面其實係一個玻璃底嘅小缸，只要你開水喉就可以做個foot spa，好細心嘅設計啊！
梳化旁邊有張俾你做日光浴嘅床，床嘅另一邊就喺落海嘅樓梯，游完水，再上去曬吓太陽，覺得熱又去浸吓水，人生一大享受！
其實villa內可以享受日光浴嘅地方又點止呢兩度，仲有兩張網床俾你攤吓，海風直接從背後吹上嚟，真係好爽！
日頭同完陽光玩遊戲，夜晚當然都要曬吓月光！Villa其實仲有個小天台，上高一層又再同個星空近一D，想睇流星無難度！
嚟馬爾代夫嘆世界，除咗要住得豪，當然都要食得好！
嚟到印度洋上的小島，海鮮新鮮好味唔在講，連蔬菜都好fresh ，因為resort自己有個organic garden，為酒店餐廳提供有機的新鮮食材，美味又健康！
餐廳’Longitude’除咗提供酒店早餐，亦為住客提供晚餐，菜式多元化，除咗有一般西餐廳提供嘅扒類及意粉，亦有多款亞洲美食同時令海鮮，有單點亦有set，價錢當然比香港食到嘅貴D，不過酒店package已經包含早晚餐 ，除非你特別為食或大食，否則都唔需要特別再點叫食物。
至於早餐就係自助形式，雖然係open air，不過食物都好衛生，大部分食物都放喺有蓋容器。
除咗’Longitude’外，住客亦可到’Zen’享用日式晚餐，嫌去餐廳遠叫個room service喺villa享受二人世界晚餐又得。
要介紹食嘢嘅地方，又點可以少得我最愛嘅’Ice & Chocolate Studio’，呢度有超過四十款不同口味嘅雪糕及雪芭俾住客任食，只要你想就可以隨時入去，試曬所有口味。
食飽飽雪糕又唔係好想郁，不如去做返個spa啦！ 酒店嘅設計路線係走原始風，當然設計似鳥巢嘅spa room 亦不例外，雖然係open air，但陣陣海風吹來感覺非常涼快，鳥巢設計除咗可以遮陽光亦可以令D海風係入面circulate，我只係試咗個foot massage，但已經舒服到瞓著咗⋯⋯
食完嘆完就係時候郁吓身，活動一下喇~ 酒店當然有wakeboarding, water skiing或者snorkelling呢類water sports，喜歡滑浪嘅朋友最好選擇每年4月-10月嚟喇，而6-9月就最適合啦！
想relax d欣賞大自然嘅朋友就可以參加半天船河，船長會帶你去追蹤海豚丶到附近嘅小島浮潛同睇日落，甚至可以安排去無人小島上野餐嘆紅酒⋯
想了解多D Six Senses Laamu及馬爾代夫嘅資料，可以到 http://www.travelchannel.com.hk 網站 或者直接搵我馬爾大夫 傾下…
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記