馬爾大夫又有好介紹
馬爾代夫 Maldives – 世外桃源一樣嘅美景 – 蔚藍海洋丶幼白沙灘丶椰林樹影丶豪華酒店丶熱情款待丶極致享受 ⋯ 確實令人響往！ 今次我馬爾大夫Roy 帶埋 Travel Channel 幾位同事一齊去馬爾代夫, 今次唔使孤獨上路喇, 十分難得！ Thank you Travel Channel Services !! 抵讃!
同你要介紹嘅Outrigger Konotta Maldives Resort呢個 馬爾代夫Blog可謂係世外桃源嘅目的地，最適合鍾意寧靜私人空間及探索海洋世界嘅朋友 ！
Outrigger 位於馬爾代夫南部，我哋由馬累嚟大概坐咗55分鐘內陸機，之後轉30分鐘快艇就到島，路程聽落好似有D遠，但實際上又唔係好覺，反而覺得好舒服添！由我哋着陸馬累準備去轉內陸機開始，Outrigger職員就已經出現幫忙，佢帶咗我哋去Outrigger私家lounge休息一下，飲杯嘢食吓snacks，起飛前20分鐘左右職員帶我哋去做登機手續；落機後又有buggy載我哋去碼頭坐快艇，落雨都無有怕，上船後吹吹海風睇吓風景好快就到，全程貴賓式招待!
今次隨行仲有三位女同事，佢哋三位都對今次行程充滿期待。一上到島，管家隨即迎接我哋奉上welcome drink，仲送上草結手繩作歡迎禮物，之後好快手就完成check-in，請我哋上buggy帶我哋環島一周，介紹酒店設施。今次其實係我第二次到訪Outrigger，我仍然感覺奢華，而三位女士都話第一個感覺就係luxury同熱情，對酒店第一印象非常好！
Outrigger呢個島唔大，環島行一個圈30分鐘內一定完成，不過正因為島細，一切都顯得格外寧靜～
島上共有53間villa，其中20間係water villa，我哋到villa前經過主泳池及沙灘，呢個沙灘上好特別咁放咗一個大相框俾客人影相，雖然個框框好簡單，但係利用佢作攝影道具，可以影出一D比較特別嘅相，而且我都未見過其他酒店有。
今次我哋分別入住面積約2400呎嘅Overwater Villa with Private Pool，及有3035呎嘅 2 Bedroom Beach Villa with Private Pool，兩間villa空間都好大，最適合鍾意留喺Villa享受私人空間嘅朋友。
先介紹一下Overwater Villa：
房間設計間隔分明，一入去係大廳，有張大梳化丶書枱，餐枱；
旁邊就係mini-bar，有茶同咖啡提供，如果你嘅package係包全包餐，雪櫃內嘅飲品都可以免費飲。
浴室內有個圓形雙人浴缸，平時去旅行未必會浸浴嘅朋友，嚟到Outrigger應該會有想浸浴嘅衝動。
睡房對出推開玻璃門就係露台。
露台上有網床，旁邊係設有雙人太陽椅嘅spa亭，方便喜歡喺自己房間做spa嘅客人，而再旁邊就係一個有按摩功能嘅4米長L型泳池，唔游水喺度按摩吓都幾爽?游完水要曬太陽最好梗係攤上網床，清風送爽，自然曬乾。
如果要浮潛就可以喺泳池旁嘅樓梯落海，記得預早去diving centre度借定浮潛裝備放喺房，咁隨時落海都無問題啦！
而Two Bedroom Beach Villa with Private Pool就有兩層，最多可住6人，上層有個設浴室嘅兩床房間及全海日出景露台，下層就有張king size雙人床及浴室，泳池更有8.3米長，一大班人玩都無問題！兩個人想住beach villa都有one bedroom，面積約2270呎，上層有太陽椅，其中有二丶三間one bedroom beach villa更設置雙人按摩浴缸，旁邊亦有淋浴間，我個人好鍾意呢個按摩浴缸，不過就唔擔保可以住到～
Beach villa行出幾步就係沙灘，曬太陽 同落海浮潛都好方便，沙灘一落水就已經有豐富珊瑚礁，唔需要游好出～
要成為一間有水準嘅酒店，食物必需有質素，對食有要求嘅朋友嚟Outrigger大可放心！我哋嘅第一餐係同酒店經理食沙灘燭光晚餐，初時以為燭光晚餐都係＂貴夾唔飽＂，但食物上枱時就發現個portion好大，而且menu上嘅選擇好多，就算住超過4晚，相信食物都唔會有重複。
我哋食飽飽之後就喺沙灘行吓，見到有個大螢幕，原來逢星期五晚沙灘都會播放電影，住客可以喺泳池旁嘅座位觀賞，後排仲有D帳篷，同最愛喺入面欣賞電影，多浪漫啊！順帶一提，無論你嘅酒店plan係full board，half board定all-inclusive，只要補上差額就可以享受一餐令人回味無窮嘅燭光晚餐㗎啦！
Outrigger共三間餐廳，第二朝我哋就去咗主餐廳Blue Salt食早餐。早餐係semi-buffet，一去到餐廳見到有室外座位之外，仲有設冷氣嘅室內可以坐，以我所知，馬爾代夫有室內座位嘅餐廳只有Outrigger及另一間，其他只係擺放食物嘅位置有冷氣，所以 Outrigger喺呢方面確實勝人一籌。
坐低之後，侍應遞上menu，食物選擇多，我點咗廚師推介嘅egg benedict，味道一流！ 有同事點咗menu無嘅煎蛋白，酒店都即刻為佢整，可見酒店服務真係以顧客為上 semi-buffet提供嘅都係以健康為主嘅食物，有麵包糕點丶芝士丶乳酪，生果及六、七款鮮榨果汁俾客人選擇，最特別嘅係乳酪，可以配上一樽樽加咗蜂蜜嘅生果蓉一齊食。
雖然果汁選擇多，不過我個人比較揀擇，有日早餐揀嚟揀去無乜心水，水吧職員問我想飲乜，我話紅菜頭甘荀汁，佢就即刻榨咗杯俾我，第二日食早餐又見到佢，仲問我要唔要紅菜頭甘荀汁，酒店職員好細心留意客人需要，不得不俾個「讚」佢！
至於午餐及晚餐時段，餐廳都係提供單點餐牌上嘅食物，最特別係有火鍋及小朋友menu俾客人選擇。
另外日本餐廳Nala Rah供應高級日式料理（壽司及鐵板燒），Poolside Dining就係一個pool side area俾客人喺露天環境享受食物，食物都係由主餐廳廚房烹煮，食嘅都係一D輕食e.g. 沙嗲丶三文治丶pizza，沙律⋯
酒店package係包早午晚三餐，每位客人本身每天有一個數量嘅credits可以用喺主餐廳度，而家只要補上credit差額便可以自由選擇到喜歡嘅餐廳用餐，客人唔洗被規限只到主餐廳用餐。呢個”Dine around credits”政策好好，讓客人唔洗浪費本身已有嘅credits就可以去試新餐廳
講完食，一定要講吓呢度嘅活動！
一開始講過，Outrigger好適合喜歡探索海洋世界嘅朋友，原因係酒店位於最高級珊瑚礁環（第四級）上！呢度嘅珊瑚區好大，由Overwater Villa跳落水游出5-10米左右已經見到好多軟珊瑚同魚，姿態優雅嘅魔鬼魚及平易近人嘅豹紋鯊更隨時喺岸邊或villa下嘅珊瑚礁出現，鍾意潛水嘅朋友一定好開心。
今次我同三位女同事一齊探索海底世界，大家去完都對優美嘅海底世界同專業嘅教練讚不絕口！
我哋首先去diving centre借潛水用具，教練好細心咁為我哋量度眼罩同蛙鞋嘅size，確保我哋安全同舒適，而diving centre?其中有職員更係識廣東話，所以我哋好快就順利借咗合適嘅用具，之後跟住教練先去泳池試水，俾教練知道我哋有幾熟水性，容易評估可以帶我哋去邊個浮潛區域，教練話由於前一日落過雨，當日有D區域唔適合去，跟住我哋終於可以正式落海！
教練帶我哋環島一周，沿途嘅珊瑚既豐富又燦爛，令人目不暇給，一個唔小心仲可能會撞到D珊瑚，所以要慢慢避開⋯
我哋見到鯊魚同好多不知名嘅海洋生物，教練都逐一講解 欣賞完海底世界上水後，大家都好攰，職員主動問我哋要唔要飲水，我哋忘記咗對鞋佢哋又主動幫我哋拎返去泳池，真係抵讚！因為陽光普照，海天一色，陽光灑照喺七彩繽紛嘅珊瑚上，閃閃發光，令大家對今次浮潛嘅評價好高！
除咗浮潛，呢度當然都有PADI 潛水課程，亦有專俾小朋友參加嘅潛水初體驗；Water Sports Centre免費提供風帆丶獨木舟等非摩打推動活動器材，要摩打嘅例如wakeboard，jet ski就要俾錢喇～
想鍛練一下嘅就不妨去主島泳池游返半個鐘或者圍住沙灘跑吓步……
想參加其他休閒活動的話，酒店都有好多選擇，最受歡迎當然係spa啦！唔做spa的話都可以嚟spa centre享用按摩池，按摩池係歡迎所有客人享用。另外，酒店仲有kids club丶診所丶圖書館，商店，真係麻雀雖小，五臟俱全！
比較上次我到訪Outrigger，今次嘅旅程令我對呢間酒店更加滿意，尤其食物及珊瑚礁嘅質素都比上一次做得更加好，而員工嘅服務當然亦一流啦！Outrigger之旅確實令人難以忘懷！
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記