馬爾大夫又有好介紹
今次馬爾代夫Blog要介紹嘅全新馬爾代夫渡假酒店Movenpick Resort Kuredhivaru Maldives係位於好多頂級酒店所在嘅Noonu Atoll，相信大家對Movenpick呢個酒店集團一D都唔陌生，平時可能都會幫襯佢嘅朱古力同雪糕，而佢嘅酒店當然亦係五星級數，同朱古力一樣咁受歡迎！
我哋係由馬累坐50分鐘水上飛機直達酒店，如果想選擇坐內陸機或快艇都可以。Movenpick除咗地理位置好好，全天然小島四周環境優美，島上因為有一種同椰子樹係敵人嘅植物，所以全島都無乜椰子樹，反而有好多矮樹，景觀比較特別。
唔講唔知，原來呢間Movenpick係由一位波蘭人擁有，呢位波蘭老闆做事一絲不苟，佢請咗一間波蘭設計公司規劃及設計全島，而當大家都在淘寶之際，佢就連所有餐具都從由波蘭直接空運到馬爾代夫，希望整間酒店嘅每一個細節都有波蘭色彩；而事實上，我哋一到達就確確實實感受到呢間酒店嘅特別建築色彩 – 所有屋都有個長長尖頂。
Movenpick嘅所有villa都附設泳池，先介紹一下water villa。
呢度嘅水上屋係以V字型排開（其他酒店通常係橢圓形排開），內V係Overwater Pool Villa Lagoon，外V係Overwater Pool Villa Ocean，兩種villa嘅交滙點(即V字最底部分）就係全酒店嘅靈魂之處、食fine dining嘅高級餐廳Bodumas，而V字最頂兩點就設有涼亭及吊床俾客人擁抱一下印度洋！因為我都係第一次到訪字型排開嘅水上屋酒店，未到前唔太清楚個設計，所以都有D擔心villa與villa之間會太近，但去到後就發現原來距離好遠㗎，唔怕見到隔離。
Villa一入門口就對住兩塊大玻璃，望出去當然係露台、泳池及無敵大海景，另外兩邊分別係睡房及浴室。
睡房入面仲有一間衣帽間，而浴室感覺上係比睡房大，酒店設計想盡量令客人於房間內周圍都見到魚，所以浴缸係對住落地玻璃，背後就係裝咗半塊落地玻璃、可望海嘅淋浴間及廁所?呢個浴室真係好靚，我雖然經常到訪馬爾代夫不少渡假酒店，不過入到去都忍唔住嘩一聲！
Overwater Pool Villa Lagoon 及 Overwater Pool Villa Ocean嘅房間內部設計相若，分別只在於一間係建於lagoon潟湖上，另一間建於ocean大海上。
我個人就好喜歡呢度嘅潟湖，因為水淺大約只及腰，由第一間lagoon villa行到最後尾三間(距離多於一公里)，最高水位都只係大概1.6米，而潟湖底係軟綿綿嘅沙地，舒服又唔會拮腳，最適合小朋友嬉水及鍾意游水嘅朋友!
至於Overwater Pool Villa Ocean下面嘅大海其實都係沙底，不過水位較Villa Lagoon深。
作為馬爾大夫，我曾經到訪過嘅酒店數目多達54間，Movenpick係第55間，意想不到Movenpick 嘅沙灘係我去過數一數二靚嘅沙灘，沙灘好闊，沙粒幼白，而且水深只到半腰，游水嬉水都可以。如果想浮潛，落水嘅位置唔係沙灘，可以去dive centre對出伸延出海嘅橋落水，dive centre出面就係 house reef，所以係度落水可以慳水慳力。
如果有小朋友同行，客人可以選擇比water villa更大、有2200呎嘅Beach Pool Suite。Beach Pool Suite嘅設計與大自然完全融合，四周都被植物包圍，感覺好舒服；我哋入室內參觀，一開門入去就被條3米高嘅木樓梯吸引住，沿住樓梯上去係一個四周無遮無擋嘅正方形涼亭，日頭可以上去坐喺豆袋上望海、夜晚就可以喺度數星星，無乜其他酒店有類似設計嘅亭子，感覺非常特別?而亭子下面就係泳池、仲有太陽椅、sofa bed，及外形似個籃子嘅吊椅，再行出去就係私人沙灘，感覺好完美！
不得不稱讚一下酒店非常好嘅設計鋪排，酒店主人希望所有villas嘅設施及景觀都無大分別，所以特別設計全酒店嘅指定公共位置都可以睇到日出或者日落。要睇日出一D都唔難，你可以早D起身，出去食早餐嘅位置以及沙灘就可以睇到；要睇日落就更加容易，泳池、bar、dive centre，及yoga亭子都可以睇到，反而喺water villa係睇唔到㗎！
我哋到訪Movenpick時，酒店先正式開幕及運作咗17日，所以餐食方面我哋都未有機會全部試真，主餐廳Onu Marché 未能完全正式投入服務，所以我哋試唔到dinner buffet，不過都試到早餐，早餐暫時食物選擇唔係太多，但都有奄列、麵包、芝士、新鮮果汁及其他熱葷，對我來說已經夠食。
而中午我哋去咗提供環球燒烤嘅池邊餐廳Latitude 5.5食lunch。
晚上就去坐擁360度海景、提供美味海鮮嘅浪漫fine dining餐廳Bodomas試試。
另外，呢間酒店仲有個Coffee & wine lounge俾客人嘆酒、咖啡、雪糕、甜品及於每日4-5pm嘅chocolate hour任食Movenpick朱古力，愛朱古力嘅朋友睇到一定兩眼發光！我哋當然都有去試吓，去到叫咗杯咖啡同件甜品，坐低喺lounge出面嘅室外位置，邊食邊同酒店員工傾吓講吓，慢慢品嚐一下Movenpick嘅專有~!
今次你見我無特別逐間餐廳詳細介紹及評價，因為我暫時未能就食物質素及服務客觀地評價，始終酒店仍處於首個營運階段，好多細節仍在改善中，以我所見酒店餐廳主管都好樂意接受意見及努力為客人提供最好服務，相信喺不久嘅將來我就可以試真呢度嘅餐飲質素，到時就可以再為大家介紹！
雖然我哋今次無時間試試酒店嘅Sun Spa，不過我哋咁啱遇見香港嘅客人親身試過，佢哋都話個spa treatment好掂，係用法國著名護膚品牌Esthederm，分別設有4間位於雨林及5間位於水上嘅treatment room。
另外酒店當然亦有kids club、dive centre、water sports centre、24小時gym room，網球場及足球場，設施齊全。Little Birds Club為各年齡小孩度身訂造多元化活動，亦設有兒童泳池、幼兒及青少年專屬playroom，相信除咗小朋友，大人喺呢度都會搵到無限歡樂！
總括而言，Movenpick Maldives係一間CP值好高嘅酒店，除咗適合嚟渡蜜月，亦都十分適合小朋友。
要享受一個朱古力馬爾代夫假期，揀Movenpick一定無錯！
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記