馬爾大夫又有好介紹
近年來馬爾代夫有唔少新酒店開幕，當大家都追捧新酒店時，有D已經開業咗一段時間嘅高質酒店其實都非常值得推薦㗎！今次我哋到訪嘅Huvafen Fushi就係其中之一，呢間高端奢華酒店非同小可，好多外國名星嚟馬爾代夫渡假都揀佢，香港嘅郭天王同何家千金都曾經住過！
意思解作”Dream Island” 嘅Huvafen Fushi位於North Male Atoll，距離馬累只有30分鐘船程，雖然位置唔偏遠，但呢個島嘅四周環境非常優美，水底世界都好精彩！除咗天然環境迷人，酒店嘅設施都好吸引，馬爾代夫嘅其他酒店都無，我將會逐一為大家介紹。
Huvafen Fushi同其他馬爾代夫酒店一樣，有水上屋及沙灘屋，我哋今次主要睇咗一向較受歡迎嘅水上屋，最基本嘅係1400呎嘅Lagoon Bungalow with Pool，呢種房位於小島嘅東面，擁有日出景觀，一共有12間房，房間內設有香薫機，而所有開關都係以遙控控制，例如燈及窗簾；浴室設有向海浴缸，浴室用品全部都係用名牌Bottega Veneta，十分高貴 !
露台有一個好舒服嘅涼亭，涼亭內有一張戶外雙人床，係放空吹海風好地方。露台行落幾級係泳池，泳池再落幾級就係兩張太陽椅，再行出去就係落海嘅樓梯。
高一級嘅水上屋就係Ocean Bungalow with Pool，有1800呎，同樣有12間，不過就位於小島西面，擁有浪漫日落景觀。
內裡設計同Lagoon Bungalow差唔多，多咗一個有玻璃地板嘅偏廳，而浴室內嘅浴缸就升級為馬爾代夫罕見嘅雙人圓形jacuzzi，呢個按摩浴缸睇落已經夠豪，喺度望住印度洋無敵海景享受按摩，確係頂級享受！
露台上嘅涼亭特別優靜，喺度望出印度洋，視線範圍內除咗水平線外一個小島都見唔到，呢種真正嘅一望無際喺馬爾代夫十分罕有，所以嚟到記得要好好享受！
最高級嘅水上屋Two-bedroom Ocean Pavilion with Pool有3500呎，私隱度極高，可以用奢華嚟形容呢間villa！
兩間睡房分佈於左右兩邊，主人房有望海jacuzzi及直立按摩淋浴間，另一間房間都有望海jacuzzi；全間別墅任何地方，只要係向西面就可以欣賞到日落，我哋有幸親歷呢個壯麗美景，真係無懈可擊！
全villa最特別最豪嘅就係佢個私人泳池，泳池唔似其他villa只係橫放喺個露台，呢個長型泳池打直由大廳伸延到室外，我暫時都無見過馬爾代夫其他酒店有呢種設計呢！另一點令呢間villa成為高端奢華係因為佢有私人保安及好多新開酒店已經無提供嘅管家服務，難怪咁多名星都揀嚟呢度渡假啦！
沙灘屋系列嘅Beach Bungalow with Pool及Deluxe Beach Bungalow With Pool 其實一D都唔比水上屋失色，兩者都可以睇到日出，有小朋友嘅家庭就多一個選擇。
介紹完villa，先介紹一下設施。
Float活動中心，喺呢度可以玩齊所有水底及水上活動，最簡單如浮潛就已經夠吸引，因為呢一帶嘅海洋生態好好，酒店亦有於特定範圍養殖珊瑚，所以全島有8-9成範圍都適合浮潛，我今次無時間浮潛，不過就咁望落去都已經見到好多魚，如果唔參加tour到浮潛點，自己喺villa落水都應該會有驚喜。另外水肺潛水、海豚追蹤、海釣、其他摩打推動等水上活動都一應俱全，而非摩打推動水上活動就免費提供。
如果唔咁熟水性但又想接觸海洋生物，呢度每日5:30pm嘅餵魔鬼魚活動就最適合，海洋生物學家會帶領及介紹每條到嚟搵食嘅魚，我哋亦可親手觸摸，喺日落美景下認識大自然，開心難忘！
至於陸上活動都有唔少，多用途足球場、乒乓球枱、水上瑜珈亭，為客人留住珍貴時刻嘅Shutter Fish 影樓及擁有270度海景嘅Pump Gym????????而家嘅新型酒店已經唔會有咁廣闊海景嘅gym room，Huvafen Fushi呢間酒店的確好有心思，於一個獨立jetty上做一間器材完善嘅健身室，讓客人可以喺一個咁靚嘅印度洋海景鍛練身體。
島上其實仲有兩個設施好令人驚喜，第一個係位於沙灘上但伸延到海上嘅主島泳池，呢個泳池非常之大，池底以漸進顏色設計讓泳池同印度洋於視覺上連成一線，另外仲有一個專俾客人影相打卡嘅圓形泳池喺旁邊，入夜後池邊燈光效果令人感覺份外浪漫。
另一個非同凡響嘅設施就係Huvafen Spa！Huvafen Spa係全球第一個水底spa，因為佢嘅出現而令Huvafen Fushi呢間酒店聲名大噪。
Spa建於100米以外嘅海中央，其中有兩間水療房喺建於8米深嘅海底下，房間內寧靜舒適，180度水底世界令人目不暇給，你可以將鋪上水床墊嘅按摩床調較自己喜歡嘅角度一邊享受療程一邊欣賞水世界，如果趴低唔可以直望，你可以望向床邊嘅反射鏡上影像，一樣可以欣賞到水世界。
除咗硬件設計出眾，Huvafen Spa嘅所有按摩師都受過擁有20年按摩治療師資格嘅認可按摩專家Beata Aleksandrowicz嘅專業訓練，將最有效嘅無創傷性按摩技巧加入spa treatment，包括深層肌肉及反射區治療、泰式伸展，恢復能量等原素，旨在將身體全面放鬆，重拾活力，獨特手法令成個spa treatment層次提升。
除咗設施，Huvafen Fushi嘅餐飲都好令人回味，half-board package包括早晚餐。
主餐廳Celsius供應semi-buffet早餐，cold cut、麵包，乳酪及新鮮水果可以自己出去攞，熱盤就可以落order，講真而家喺馬爾代夫已經無乜酒店供應半自助早餐，為咗方便管理，大部分早餐都係自助形式，Celsius呢種難得嘅服務值得加分。
Celsius亦提供3-course晚餐，款式都有幾多選擇，餐牌上有海鮮意粉牛扒，如果想另外食一D較高級嘅海鮮，就需要額外加錢喇。
我哋亦試咗日本餐廳Feeling Koi嘅廚師發板晚餐，呢度供應嘅係日本拉丁fusion菜，別樹一格，味道當然令人滿意。Feeling Koi隔離有一間細少少嘅露天餐廳，於午餐時段供應raw food。
另外亦有一間主要供應午餐嘅餐廳Forno，位於Celsius旁邊，我哋都有食過，呢度嘅pizza以柴火烤焗，熱辣辣新鮮好味，仲有意粉及麵包都做得出色????????
如果想飲嘢傾計，仲可以去Um Bar。
客人除咗喺島上嘅餐廳用餐，亦可選擇有13個地點選擇嘅Destination Dining，於酒店嘅特別位置享用美食，例如Underwater Spa Breakfast，泳池上嘅Infinity Seafood Sensation，伸出海中心提壆嘅Rock Dinner，每個地點嘅menu都唔同，各有特色。
視察過環境、房間，設施及餐飲服務後，我覺得Huvafen Fushi確實係一間值得推薦嘅渡假酒店，雖然已經有十幾年歷史，但無論硬件軟件都做得好好，最令人驚喜嘅spa值得一試，10分滿分我會俾呢間酒店8分
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記