馬爾大夫又有好介紹
Hilton group旗下的高端奢華酒店Waldorf Astoria Maldives Ithaafushi剛於2019年7月先開業，可謂集團中最頂尖奢華渡假酒店，位於被評為第四級珊瑚礁環內嘅South Male Atoll，由三個（人工）小島組成，一共有122間villa及11間餐廳，面積非常大，係馬爾代夫奢華酒店嘅十大之一。
今次我哋由馬累機場入島係坐豪華遊艇，遊艇上有兩間房，屬於酒店擁有最細嘅遊艇，最大係全長70呎嘅四房遊艇，聽到都覺得奢華，喺馬爾代夫唔係好多酒店有咁高級嘅招待；30分鐘嘅船程非常舒適，有精緻小食供應，包括黑白朱古力、蛋糕、三文治及新鮮水果，而且船長仲俾機會我試吓揸遊艇，所以我哋一行四人都好享受呢程船。
一上到島，我哋受到熱烈歡迎，十幾個員工上前歡迎我哋四個及同船嘅一家四口，大家都受寵若驚，感覺好親切。Lobby好大，check in時管家奉上以新鮮香茅做飲管嘅welcome drink及介紹酒店房間類型，之後我哋就坐buggy四圍參觀再入自己villa安頓。酒店房間類型有20種，分佈於三個島上，但所有房間內部佈置大致一樣，而且都配備可轉波段嘅私人單車方便客人穿梭島上各處。
我哋入住嘅係King Reef Villa with Pool，約2900呎，可住兩大兩小，呢間房嘅特色佢建於陸地上，附近都係園林景觀，但露台伸延出海洋，客人又可以由露台直接落海，感覺上同住overwater villa水上屋冇乜分別，露台有泳池及網床，浮潛睇魚一跳落去就得，而浴室亦有室內及室外兩個位置，淋浴區喺室外，四圍係園林，可謂一間沙灘水上屋。
一入villa就覺得房間非常華麗堂皇，因為樓底好高；房間中間係衣帽間，男女用品都已經分別擺放兩邊方便使用，睡拖、浴袍、風褸、油紙傘都好靚好實用。
穿過衣帽間可以通往浴室，大浴缸配備薰衣草浴鹽，浴室用品選用德國高級牌子，感覺高貴典雅，確實配得上係一間luxury hotel。
房間內嘅燈及窗簾都以智能控制，只要ipad在手，無論係浴室定露台嘅燈都可以遙遠控制，十分方便，嚟馬爾代夫渡假就係懶洋洋。
特別一提大部分女士都好注重嘅梳妝枱，鏡多而且仲有手飾格可以將唔同種類飾物分類，同行女士就覺得咁嘅設計特別體貼，大讚。
總括而言，呢間villa嘅設備一應俱全，就算要求幾高嘅客人都可以滿足佢哋！
海洋環境方面，位於第四級珊瑚礁環內嘅Waldorf Astoria附近水域當然有睇頭！我哋冇特別去浮潛點落水，因為我哋住嘅villa本身已經建於珊瑚礁環內，所以直接於露台落去已經有好多魚！潮漲時，5呎4吋高嘅同事從villa落水，水深約到膊頭，佢話佢行咗幾步之後開始游已經見到想見嘅魚，好容易亦好好玩；如果潮退時落水，水深只係約到大腿位置，因為係沙底，所以可以行出幾步就游，輕而易舉就可以欣賞到精彩絕倫嘅馬爾代夫海洋世界，令人十分驚喜！
Waldorf Astoria令人驚喜嘅唔止房間同海洋世界，酒店嘅11間餐廳都非常唔錯，馬爾代夫唔係好多酒店有咁多餐廳㗎！我哋只住咗三晚，無辦法試曬所有餐廳，所以今次為大家介紹我哋試過嘅五間餐廳。
早餐我哋去咗位於沙灘旁嘅Tasting Table享用，自助形式早餐加上可以額外再單點食物，都幾豐富，擺放自取食物嘅位置唔大一眼望曬，不過款式亦唔算少，每份食物都細細碟好精緻，賣相吸引而且味道新鮮，大家都對早餐滿意。我個人認為如果餐廳位置空間多D，客人感覺上就會更加享受。
午餐我哋就到充滿活力嘅Nava享用，Nava位於酒店三個小島中間娛樂設施嘅所在島，餐廳旁邊就係泳池同beach club，有現場DJ打碟，其他活動設施亦鄰近，所以喺度食嘢好歡樂。Nava主要供應pizza漢堡包等輕食，不過其實佢都會供應旁邊新加坡米芝蓮一星餐廳The Ledge by Dave Pynt嘅食物，所以都幾多食物選擇????????我哋試咗新鮮生蠔、豬肉龍蝦雲吞、牙買加雞翼及待應推介嘅牛肉漢堡，全部都好好味，尤其係生蠔，配上與平時食開唔同嘅醬汁，感覺特別新鮮。
最後一日嘅午餐，我哋都特登試咗米芝蓮餐廳The Ledge by Dave Pynt，因為時間關係我哋叫廚師為我哋準備一D佢推介嘅菜式，我哋試咗好多款，而且款款都好好味。
晚餐之前，我哋當然先去欣賞馬爾代夫日落！沿著海邊而建嘅Amber Sunset Bar專為觀夕陽設計，讓客人可以坐喺伸出水上嘅梳化上，一邊細味香檳，一邊欣賞精彩絕倫嘅馬爾代夫夕陽美景，非常浪漫醉人！
太陽一下山，四周景象都唔同曬，我哋都隨即去酒吧旁邊嘅Glow食晚餐。Glow係一間主張garden-to-table嘅有機餐廳，食材新鮮菜式健康，因為工作關係我哋被安排坐Chef’s table，見到餐廳嘅蔬菜食材都會經過人手篩選，確保將最新鮮送到客人面前。我哋叫咗無激素雞配藜麥，雞胸下面墊上藜麥飯，味道不錯。
第二晚我哋去咗食阿拉伯菜嘅Yasmeen，因為我哋唔識點菜，所以都係侍應幫我哋點，我覺得菜式味道偏酸，不過都食得好飽，未試過嘅可以嚟感受一下異國風情，不過不失。最後我哋參觀咗位於山丘上嘅fine dining restaurant Terra，佢供應世界上最高級嘅菜式，例如宮崎和牛及白松露，喺度可以另一個角度欣賞印度洋，又有另一番風味！
嚟得馬爾代夫，當然一定要玩水！Waldorf Astoria嘅水上活動包羅萬有，非摩打及摩打推動嘅水上活動超過15種，仲有浮潛、水肺潛水、海釣及海豚追蹤等⋯
之前提及過，酒店三個島中間嘅一個係娛樂設施所在島，Spa及Fitness Centre當然唔少得，另外仲有兩個泳池延伸出沙灘，氣氛輕鬆自在；呢度仲有個Young Discovery Park，裡面有一個專為4-11歳小朋友而設嘅水上樂園，喺馬爾代夫少之又少，非常適合有小朋友一齊嚟嘅家庭，大人可以享受me time，小朋友又可以擁有一個屬於佢哋自己嘅馬爾代夫假期????????????
Waldorf Astoria Maldives Ithaafushi嘅設施及服務確係頂級luxury，推介俾追求嚟馬爾代夫享受頂級奢華嘅朋友！
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記