馬爾大夫又有好介紹
今次介紹呢間馬爾代夫酒店，我會以四個字去形容：與．別．不．同！
Soneva Jani係Soneva集團?面最新嘅酒店，早喺1995，集團創辦人Eva同Sonu喺馬爾代夫興建集團第一間酒店Soneva Fushi，喺2016年10月集團最新嘅Soneva Jani亦正式開幕，係馬爾代夫嘅＂回到原始＂豪華酒店！
我哋由馬累坐40分鐘水上飛機就到Soneva Jani，差唔多要降落時我望到個海閃閃發光，望真D原來係D villa反光，好靚好吸引！落機後踏上浮台，我感覺自己到咗＂水上世界＂，因為成間酒店都建於水上，感覺零捨不同！
先同大家介紹一下酒店嘅四周環境，酒店位於嘅主島好大，主要分為五個部分：中心丶東面丶南面丶西面丶北面。
中心係熱帶樹林區，全地遍佈紅樹林，亦有好多蟹仔，仲有兔仔，可想而知酒店對自然環境採取嚴謹保育措施，仲唔會好似其他酒店咁放煙霧滅蚊，希望盡量保留馬爾代夫原有生態環境，所以遊客參觀呢一帶，都要預備定蚊怕水。
東面係turtle beach，海龜出沒產卵嘅沙灘。
南面係Cinema Paradiso，水上私人影院同酒吧，呢個私人影院係馬爾代夫首間水上靜音影院，今次真係大開眼界，我第一次見個大營幕掛喺海中心，而睇戲嘅賓客都獲配藍芽耳筒，咁様就唔會破壞到周圍寧靜嘅自然環境啦 !
西面係Watersports Champa，水上活動中心，沙灘好闊好大，呢一區水好淺，只到膝頭，好適合一家人同小朋友玩水，呢亦係觀賞日落嘅好地方!
北面係water villa丶餐廳丶dive school等設施嘅所在地～
酒店有嘅房唔多，water villa只有25間，其中18間係One Bedroom Water Retreat，其餘就係俾家庭嘅多房villa。
Soneva Jani嘅餐廳亦都係非常之與別不同！建於水上嘅三層高活動中心The Gathering位於整間酒店嘅中心，故名思義係聚集嘅地方，希望各住客可以喺呢度gather一齊熱鬧一番！
主餐廳喺The Gathering裡面，設計光猛，給人舒服感覺，另外其他區域亦有點心區、生果區，甜品區等⋯The Gathering亦連住酒庫丶圖書館丶spa同商店，而隔離就係觀星台，嗰度都有個星空餐廳，客人可以邊吃邊欣賞繁星。
The Gathering三樓係gym room，落地玻璃對住閃閃發光嘅villa，個view一流！
呢度仲有條超長滑梯，所有住客都可以嚟玩，相信喺度玩比係自己villa內玩更加開心?
其實除咗喺The Gathering裡面嘅活動外，Soneva Jani仲提供好多其他好適合家庭嘅活動：Dolphin tour 丶沙灘野餐丶月圓夜晚餐丶浮潛丶觀星⋯應有盡有，包你玩唔曬！而小朋友就更加多嘢玩，因為呢度嘅kids club好大，大人如果想自己去輕鬆一下，絕對可以放心將小朋友交低俾呢度嘅管家，佢哋可以幫忙照顧一下，或者小朋友都可以參加吓D course同tour，好似lego、角色扮演遊戲、參觀有機莊園、認識海龜保育etc⋯⋯
Soneva Jani嘅water retreat真係唔講得小，亦係令酒店變得與別不同嘅地方！
今次我哋住One Bedroom Water Retreat with slide，全酒店得9間，兩層嘅別墅面積誇張地大，一共有4500呎！以我所知，Two Bedroom Water Retreat有6000呎，Four Bedroom Water Retreat更有成15000呎！
入到嚟，我哋覺得自己入咗間大宅一樣，唔多相信全間villa都係我哋住曬，好想叫埋D屋企人一齊嚟享受吓！
Villa間隔分明，除咗空間極大嘅主人房及小孩睡覺區外，仲有個大廳丶書房丶衣帽間、半露天浴室，廚房同埋mini-bar。主人房嘅雙人床對上係一個電動開關伸縮屋頂，只要㩒一個掣就可以開個屋頂嚟睇星星，你可以望住佈滿星星嘅夜空瞓覺，而且就算睇睇吓瞓着咗都唔洗擔心，因為個屋頂有雨水感應系統，萬一落雨佢會自動閂埋。
大廳內有張大型橢圓形梳化，坐喺度除咗可以望住個無敵大海景，亦可以透過梳化前嘅玻璃欣賞到海底嘅動物，隔離都有張凹咗入地下嘅枱，座位佈置舒適，可以坐喺度飮吓嘢望吓腳下玻璃地板嘅魚仔。
房間內嘅廚房仲提供酒店自家製乳酪同朱古力，當然都有咖啡機俾鍾意飲咖啡嘅朋友慢慢嘆！
另外，我必定要介紹一下我好喜歡嘅半露天浴室！
浴室有蓋部分其實都係通風，一邊迎著海風一邊梳洗，設計極之特別，而地板中間都有一塊玻璃可以俾我哋睇到魚仔；浴室露天部分就有個浴缸同淋浴間，同埋落海嘅樓梯都喺呢度，方便落完海上水後立即沖身，當然呢度係有遮擋，唔會有人睇到你出浴啦?
Villa露台景觀十分開揚，個泳池好長，係依著別墅嘅長度而建，泳池上設網床，泳池再對出有太陽椅同一張特別伸延出大海嘅圓形大梳化，坐喺度欣賞海景又有另一番感受！
Villa嘅二樓又有梳化位，夜晚上嚟睇星傾計就最正；旁邊就係同埋全間villa最好玩嘅地方 – 海上滑梯！
呢條滑梯雖然只得一個彎位，不過離海面都有兩層高，而且個view實在太太太靚，我諗大家都應該同我一樣，成世人都未玩過’sir’落海嘅真滑梯，所以真係好開心好興奮！
如果你帶埋小朋友嚟，相信佢哋一定開心到瞓唔著！滑梯旁邊仲有個懸空掛床，呢個都係其他酒店無㗎！
咁與別不同嘅酒店，喺馬爾代夫除咗Soneva Jani都真係搵唔到第二間～
想享受一個零捨唔同嘅馬爾代夫假期，我就推介你揀Soneva Jani喇，快D了解一下詳情啦！
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記