馬爾大夫又有好介紹
今次呢個blog, 可以話係近期最優質馬爾代夫的低調但Luxury Maldives Hotel – Vakkaru !
馬爾代夫酒店多不勝數，好多朋友揀到一間硬件設施啱心水嘅酒店 ，但可能餐飲方面又未必能滿足自己要求，到所有服務設施都合乎心水時，可能個價錢又超出預算⋯ 今次我要介紹嘅Vakkaru Maldives係2019年性價比超高嘅 豪華渡假酒店，你慢慢睇我以下今次呢個 Vakkaru blog嘅介紹就會明白我點解咁講 。
先介紹一下 Vakkaru Maldives 嘅基本資料：
Vakkaru位於嘅Baa環礁喺聯合國教科文生物圈保護區內，係世界自然遺產。要到Vakkaru，最簡單就係坐25分鐘水上飛機，客人到達馬累後，酒店職員就會派酒店專車載客人到酒店私人候機室休息一下 ，並會安排水上飛機於兩小時內起飛；如果客人於傍晚之後到馬累，酒店就會安排內陸機送客人到酒店，機程大概20分鐘，之後再轉30分鐘船程就會到Vakkaru。
我哋係坐水上飛機直達!
Vakkaru呢間處於寧靜熱帶小島嘅渡假酒店得天獨厚，四周環境一切孕育於自然，酒店範圍內全無人工島嶼，絕對無添加??圍繞全島走一圈約1.6公里，屬於中大型島，全島有一千四百多棵天然孕育嘅大樹，周圍都係茂盛樹林，就算大熱天太陽高高掛，四處都有樹蔭，所以感覺好涼爽！
我哋第一日到達時剛好仲係早餐時段，所以我哋check in後就去咗位於主理國際菜式嘅海濱餐廳Amaany試吓早餐先?
餐廳放食物嘅地方好大（目測有2000-3000呎），食物種類當然多，熱葷食物有中式點心、炒麵、各類烹調方法嘅蛋、班戟及窩夫、西式食物如腸仔煙肉薯仔；另外麵包蛋糕、生果及果汁當然亦唔少得，生果每款都切到細細粒，確保新鮮，款式亦每天都會轉，住幾日都唔怕悶；至於果汁亦非常足料，款式我哋見過有菠蘿汁、甘荀汁、蘋果汁同西柚汁，另一邊仲擺咗D香檳，我見外國嘅旅客都好鍾意飲㗎；另外要一提嘅就係無乜酒店會提供嘅健康早餐食物：天然乳酪配茶籽及藜麥，追求健康嘅朋友嚟到Vakkaru一定好滿意！
呢個早餐無論係食物嘅味道同餐廳嘅服務都屬中上，我哋都感到好滿意?
講開食，順便介紹埋其他餐廳：
Isoletta：充滿魅力嘅意大利時尚餐廳，提供跟得上潮流嘅傳統意大利午晚餐
Cabana：我哋第一個午餐就喺呢個位於池邊嘅戶外lounge食，客人除咗可以喺度享受悠閒午餐、下午茶等，活動後過嚟Cabana嘆吓最好不過??
我哋二人分別點咗seafood salad及chicken salad。本身我預期嘅Seafood salad係salad份量多過seafood，誰不知一上菜，蝦、蜆、青口、八爪魚，魷魚共有五款海鮮，加上薯仔、蕃茄及菜，材料足無馬虎，味道甜甜酸酸，清新泰式風味，海鮮味道突出，讚！至於chicken salad就有三色椒、青瓜、雞胸肉，本身以為雞胸肉都應該普普通通，但一咬落去就發現原來廚師廚藝高明，可以煮到鬆化唔鞋嘅雞胸肉?沙律味道一次較濃一次較淡(無錯，我哋叫過兩次chicken salad) ，不過兩個味道都ok，我哋就比較喜歡濃味D。
Vakku Grill：沙灘邊提供小島風味燒烤餐廳，一邊食一邊可以欣賞廚師烹煮過程，我哋第一晚就喺呢個有情調、舒適嘅地方食晚餐，只可惜唔係同我愛人嚟?
我哋點咗個以神戶和牛造嘅生牛肉他他作前菜、燒雞胸及燒龍蝦，重點推介係燒龍蝦！全隻上嘅極新鮮龍蝦燒得恰到好處，四邊嘅龍蝦肉彈牙爽口，而龍蝦中間嘅肉就好淋甜，有D刺身嘅感覺，整體又甜又多汁，極之美味，我俾滿分，真係令人回味無窮！
Onu：提供亞洲菜，全餐廳裝潢以竹造，食材都係來自酒店自家有機農場，新鮮健康，所以食物充滿東方色彩，我哋第二晚喺呢度食晚餐。由於前一晩嘅龍蝦太好味，第二晚我哋繼續點龍蝦食，今次食東南亞風味嘅咖哩龍蝦球?雖然係龍蝦球，不過仍然係原隻上，配以芒果及茄子一齊煮，十分美味；另外仲點咗個配料十足嘅冬蔭功，及配糙米飯嘅咖哩雞??
講咗咁耐食，係時候介紹一下大部分朋友最關心嘅住宿質素啦！
Vakkaru分別有12間位於叢林中嘅Beach Bungalow及12間位於沙灘上嘅Beach Villa，有小朋友就可以揀住到最多三個小孩嘅Beach Family Pool Villa，另外仲有Beach Pool Suite，Deluxe Beacg Pool Suite及Two Bedroom Beach Villa。我哋今次係住Two Bedroom Beach Villa，呢度嘅two bedroom唔係兩房villa咁簡單，係兩間獨立beach villa打通(中間有門)，都適合兩對couples入住，因為私隱度都高。不過，今次我主要想介紹Vakkaru嘅三種水上屋：
1）Overwater Pool Suite：共有5間，係位處最出嘅水上屋，總面積大概4000呎，可容納三個大人；一推門入去就係客廳，之後睡房，衣帽間及浴室。
房內擺設高貴，設備現代化，房內所有電子產品及窗簾都以ipad控制，床頭燈設計係隱閉式，有需要先拉出嚟，設計人性化??
Pool Suite嘅露台好大，我哋用腳步量度過，露台直徑有36步，由於無涼亭嘅關係，視覺上好開揚，感覺更舒服！
而泳池都有50平方米咁大，最出嘅位置有個玻璃位，令住客可以同大海距離更近！
2）Overwater Villa：共有43間，總面積約1600呎，雖然無泳池，但計面積已經贏咗好多酒店嘅有泳池villa，房間之大要容納honeymooner兩個人甚至帶多個小朋友當然無問題；設計上與Overwater Pool Suite無乜大分別，只係無咗客廳及衣帽間，而我最鍾意就係浴室嘅淋浴區，因為嗰度特設透明玻璃，讓住客沖涼都可以望住個海景，反而pool suite係無呢個設計㗎！
3）Over Water Family Villa ：共有10間，與Overwater Villa設計一樣，只是於睡房及浴室之間多咗20-30呎空間放咗兩張day bed俾小朋友做床，最多可以住三個12歲以下嘅小朋友。
我大推水上屋當然有原因啦！
Vakkaru位於嘅Baa環礁喺聯合國教科文生物圈保護區內，附近有三個藍洞?喜愛潛水嘅朋友就知道，藍洞係各種海洋生物嘅棲息地，所以附近一帶必定會有大量魚群出沒。Vakkaru附近嘅藍洞有兩個於水上屋範圍內，最近一個由出少少嘅水上屋出發游20-30呎就到，即是話如果你住最出嘅水上屋，一踏出露台跳落水踢幾十下水就會睇到好多魚，一日落兩、三次水都無問題！但如果你比較喜歡游水，我就建議你住近D嘅水上屋(Over Water Family Villa )，因為入面潟湖較適合暢泳。假設你唔係住水上屋，要到藍洞浮潛就只可喺距離較遠嘅spa centre落水。除此之外，我馬爾大夫覺得Overwater Villa及Over Water Family Villa喺2019年嘅性價比真係好高，所以水上屋真係首選！
住宿及餐飲都咁令人滿意，酒店嘅設施都非常不錯！除咗dive centre及 water sports centre提供嘅各種水上活動，特別係Splash Water Sports Centre嘅活動比其他渡假酒店多，例如唔係好多酒店有嘅Big Game Fishing，US1800包船及所有器材8小時，我睇過D器材都好新及updated；而如果你喺Vakkaru學潛水，就會到藍洞附近開始，絕對係一個好特別嘅經驗??
另外酒店嘅gym room器材足夠，仲有戰繩，亦設有露天平台讓住客可在無冷氣空間下出汗。
小朋友喺Vakkaru亦一定樂而忘返！ParrotFish Club內多元化嘅設施為3至12歲的小孩度身訂造各類活動，室內有遊玩及活動角刺激小孩想像力，室外亦有探索角及兒童泳池。
Coconut Club就特別為一家大細而設各種活動，讓住客可以同家人一齊創造更多難忘回憶！
Vakkaru Spa建於海上，實際上就同其他水上屋一樣每個獨立treatment 房都擁有無敵海景，設有露台及太陽椅，而客人做spa嘅床對下地板係一塊大玻璃，入到去感覺真係極舒服。Spa centre仲有個所有住客都可享用嘅steam & sauna，佢哋分別設於兩間villa內，中間由一個亭連住，亦設有兩個獨立按摩泳池，環境優美，唔做spa嘅朋友都一定要嚟呢度享受一下悠閒！
如果要我評分，10分滿分我會俾Vakkaru 8.5-9分，無論環境、住宿、餐飲及設施都令我覺得好滿意，而2019年性價比甚高，事實上要喺馬爾代夫搵個無人工化嘅新開發島嶼實在難度高，所以來年要到馬爾代夫享受沒有架子嘅奢華，首選Vakkaru！
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記