馬爾大夫又有好介紹
現代好多人都希望旅行返嚟後可以身心舒暢、重新得力，尤其一生一次嘅渡蜜月又揀得去馬爾代夫，當然希望揀選一間環境優美、奢華舒適，如果加埋以奉行健康原則嘅酒店就最完美！
位於聯合國教科文組織生物圈保護區嘅渡假酒店The Westin Maldives Miriandhoo Resort剛於2018年10月先正式開幕，酒店鄰近全球最多鬼蝠鱝聚集之Hanifaru Bay，海洋世界靚就唔在講，設施亦應有盡有，小島屬於中型，圍繞走一圈大概20分鐘。酒店希望到來嘅旅客除咗可以欣賞海洋，亦可於酒店內舒適地享受一個健康假期，特別製訂咗一個”six well” 服務宗旨，令入住嘅客人身心靈都可以真正享受健康假期。
先介紹一下Westin嘅硬件設施：
全酒店擁有41間沙灘屋及29間水上屋，我哋今次係入住大約1500呎嘅Overwater Villa，另外仲有1600呎嘅Overwater Villa with Pool。
一推開大門，我已經被吸引住，因為感覺超級開揚，而且空間十分寛敞，別墅可分為四個唔同區域，休息廳、飯廳、睡房及浴室，望落去整間別墅內無任何間隔，但其實設計師已一早將間隔趟門隱藏，客人如果有需要可以隨時將門趟埋，留返一D私隠！
休息廳設有梳化及大皇帝椅，夫婦倆坐喺度透過大玻璃地板睇吓魚欣賞一下海洋世界，溫馨浪漫新體驗。
飯廳除咗minibar及一般咖啡茶，亦特設一部手動榨汁機及每日供應香橙一盤，客人可以隨時自己動手做鮮榨橙汁，想無咁澀就先將D橙雪凍，咁D橙汁就最好味！
睡床床頭面對住印度洋海景，每朝一睜開眼就可以望住個海，而且床頭櫃更放有香薰油，客人可以滴幾滴落枕頭，放鬆心情入眠。
浴室設有馬爾代夫少見嘅智能馬桶，浴缸亦配備浴鹽。
房間外嘅陽台景觀開揚，簡單設置太陽傘，太陽椅及餐枱，有樓梯直接落海，如果係有泳池房間就會大少少，因為呢度嘅泳池超過7米長，可以游到4-5下，其他酒店嘅一般都只可以游到1-2下；如果入住無泳池嘅房都唔緊要，直接落印度洋游，呢度嘅海底世界令人驚喜！
水上屋下面水域巳經係珊瑚區，要睇魚可謂不費吹灰之力，而且房間內一早已配備浮潛用具，可以隨時落海欣賞印度洋。
除咗房間設施，酒店亦設馬爾代夫唯一一間24小時gym room及駐場教練，喜歡健身嘅朋友可以不受時間限制做運動，如果無帶健身服飾亦唔需要失望，因為呢度提供租借服務，興之所至都無問題！
另外游泳池、網球、排球及籃球場，kids club及擁有無敵海景及按摩池嘅Heavenly Spa⋯⋯如果嚟渡蜜月，酒店會送30分鐘免費按摩，我哋都試做咗，出奇意料嘅舒適！
Westin一共有三間餐廳及一間sunset bar：
如果買嘅package係half board plan，已包含基本嘅早餐及晚餐。
全日開放嘅主餐廳Island Kitchen奉行”Eat Well”原則，提供以天然食材炮製嘅均衡營養中、日及馬爾代夫菜式，客人會喺度享用自助早餐，早餐食物款式多，果汁選擇亦多，感覺似午餐一樣豐富，仲可以自己再點食物，我就另外叫咗個蘑菇炒蛋，廚房都可以整到，滿足客人個別要求????????午餐時段Island Kitchen則提供a-la-carte menu嘅菜式，晚餐亦一樣。
Island Kitchen上面2/F有個酒窖，另一邊係一個休閒活動區，有D桌上遊戲及桌球等活動提供，再行出露台就係氣氛熱鬧嘅sunset bar，客人可以坐喺舒適梳化椅上聽住音樂欣賞日落，輕鬆自在！
日式海景餐廳The Pearl只於晚餐時段開放，提供新鮮魚生刺新日本菜，half board plan包含入住期間一頓5道菜日本餐，如果覺得唔夠食可以加US40升級至7道菜。
氣氛輕鬆嘅Hawker則提供亞洲fusion街頭小食，live kitchen即煮越泰小食，係下午茶好地方。
一開始提及過酒店有個 “six well” 服務宗旨，包括：Sleep Well, Play well, Eat well, Move well, Work well及Feel well，全部都同健康生活有密切關係，上面介紹房間及設施時，大家可能都見到酒店於一D細節位滲入咗呢六個”well”，例如房間嘅香薰油及榨汁機（sleep well & eat well）、主餐廳嘅營養菜式（eat well），Heavenly Spa（fell well）及24小時健身室（move well）等等，希望嚟蜜月旅行嘅夫婦可以擁有一個回復活力、重拾健康嘅理想假期。
如果你倆都希望蜜月假期除咗吃喝玩樂，仲想保持健康，The Westin Maldives定能滿足到你！
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記