馬爾大夫又有好介紹
Hideaway呢個名大家可能唔係第一次聽，或者泰國嗰間好多朋友都去過，今次我要介紹嘅Hideaway Beach Resort & Spa Maldives同泰國嘅無乜關係，唯一相同之處就係兩間都係好舒服嘅渡假酒店。
Hideaway Beach Resort & Spa Maldives位於Dhonakulhi Island，呢個島本身係一個外形似彎月嘅大規模島嶼，中文名叫＂神仙珊瑚島＂，四周都被大範圍嘅珊瑚礁包圍。
由馬累嚟Hideaway，需要坐45分鐘內陸機，再轉25分鐘快艇。
酒店2008年開幕，最初係無water villa嘅，但2014年翻新時就喺水深只及腰嘅潟湖上新建咗50間水上屋，而島嘅另一邊就係浮潛活動珊瑚區。呢間每年都得獎嘅酒店每年都吸引不少世界各地嘅遊客嚟渡假。
馬爾代夫間間酒店都好似差不多，咁Hideaway嘅最大賣點係咩？我覺得一定係非房間莫屬！
我哋今次入住Deluxe water villa with pool，面積約2000呎，最適合嚟honeymoon嘅夫婦。
一打開villa大門直望落地玻璃，感覺舒適而且時尚，大門直入呢個位亦將整間長方形嘅villa打橫切開，被切開嘅villa中間係無嘢阻隔，所以感覺好大。
Villa嘅左邊係睡房，右邊係浴室，喺浴室內嘅按摩浴缸亦都可以望到海，亦可直接行出露台；
而露台就係橫跨整間villa，所以呢個長方形嘅露台都幾大??
露台大泳池都唔會細，目測都有成5米闊，而且仲有按摩功能。
再講，呢間villa嘅私隱度極高，要望到隔離屋係無乜可能，但自己間villa又有咁開揚嘅景觀，真係唔係好多酒店做得到，所以我對呢間villa真係無乜特別挑剔，誠意推介！
如果你係一家大細嚟，就可以住Ocean villa with pool，面積有3000呎，喺最大嘅沙灘附近。
另外Hideaway嘅Beach residence with plunge pool亦都好適合帶小孩嚟嘅家庭，房間面積約2000呎，不過室外範圍好大，小朋友喺度跑跑跳跳同玩沙就最好不過。
Hideaway 其他配套設施亦都齊全，網球場、籃球場、kids club、gym room、乒乓球、桌球、diving centre、spa centre，診所等⋯
呢度嘅kids club活動有專人團隊帶領各種活動，見到張活動表上寫嘅活動好有趣，有crab race, sandcastle making, island hide & seek…etc etc，歡迎所有3-12歲嘅小朋友，包佢哋唔會悶！
至於酒店嘅餐飲方面，大部分都係喺Matheefaru主餐廳，我哋早午晚都係喺呢度食自助餐，餐廳環境不錯，不過食物款式不太多選擇，如果住多幾日嘅朋友可能會覺得悶咗少少。
但係，酒店亦有另一間餐廳Meeru Bar & Grill俾住客選擇，而且係單點，full board嘅住客亦可以揀set，食物比自助餐好味D。想食亞洲菜就可以去 Samsara Asian Fusion，呢間水上餐廳serve 泰國、印度及日本菜，不過我哋無試過，所以食物質素如何就唔知啦；最後，仲有一間sunset pool cafe，喜歡飲cocktail嘅朋友可以嚟試一下。
總括來說，我覺得Hideaway嘅硬件真係無得輸，好多住過嘅朋友都有讚無彈??
但係我要溫馨提示一下對食同玩要求較高嘅朋友，喺Hideaway嘅消費可能要預算多一D，因為可能你會希望自費試多兩間餐廳，而呢度嘅活動收費亦比其他酒店貴約30%⋯
不過既然咁難得嚟到馬爾代夫，洗多少少換來多多開心，乜都抵啦！
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記