馬爾大夫又有好介紹
Heritance Aarah係Adaaran集團於馬爾代夫嘅第六間渡假酒店，於2019年3月先開幕，屬於六間酒店中最高級數嘅一間，提供all-inclusive豪華全包套餐，讓客人無拘無束享受假期，希望為客人帶嚟高級奢華服務。
Heritance Aarah位於被豐富天然環境包圍嘅Raa Atoll，從馬累嚟坐40分鐘水上飛機，或者20分鐘內陸飛機加30分鐘船。酒店歡迎所有年齡客人，所以無論蜜月遊或一家人嚟渡假都非常適合。
呢間酒店嘅最大特色就係餐廳多，一共有六間餐廳及兩間泳池酒吧，為客人提供各國佳餚美饌，早午晚三餐嘅全包豪華套餐讓客人可以無限制地於任何一間餐廳用膳，必定能大快朵頤，首先等我介紹一下呢八間餐廳及酒吧。
呢度有兩間全日供應自助餐嘅主餐廳，各自位於兩條水上屋嘅橋頭位置，分別係Ranba及Baani，Ranba供應各國美食，而Baani則只開放俾Ocean Villa嘅住客，食嘅係中東菜自助餐，兩間主餐廳嘅食物選擇都好多，而且做得好出色，色香味俱全，唔想諗又想乜都試嘅朋友就最適合。
Ralu係意法餐廳，適合喜歡fine dining嘅食家；型格海鮮餐廳Ginifati供應沙灘燒烤，客人可以邊吹住海風邊享用美味海鮮；Ambula供應現代斯里蘭卡菜式，set有十道菜，每道菜份量適中，唔算heavy，食物水準我覺得特別好，對香港人而言一定算新口味；另一間供應街頭小食嘅Hathaa亦係幾特別，我冇時間試食，不過我見餐廳氣氛好好，因為有live kitchen現場煮食，客人都好享受，斯里蘭卡及街頭小食餐廳都一樣只係有晚餐食。
要享受馬爾代夫嘅真正寧靜，除咗喺自己villa，仲可以去專為Ocean Suite住客而設嘅Infinity Pool & Bar叫杯冰凍啤酒，靜靜欣賞夕陽；最後一間酒吧Bandhi係享受熱鬧歡樂嘅好地方，全日開放，喜歡飲杯雞尾酒或食D輕食可以隨時到呢間池邊酒吧輕鬆一下！
Heritance Aarah其實屬於大型渡假酒店，一共有70間Beach Villa25間Ocean Suite及56間Ocean Villa，要環繞個島一圈要超過30分鐘。
Beach Villa大約1000呎，Pool Beach Villa就有1100呎，以奢華雅緻佈置，每間別墅都被椰林樹影包圍，私隱度高但景觀開揚，露台直達沙灘。如果人多，可以入住可容納6位大人嘅Family Beach Villa，有小朋友嘅家庭一定樂此不疲！
我哋今次入住1700呎嘅Ocean Suite，以覆式設計，喺馬爾代夫少有。
一推大門入去有個玄關位，右邊係上2樓嘅樓梯，左邊係大廳，放咗一張L型大梳化及茶几，地板係一塊大玻璃，梳化面對露台，感覺寬敞開揚，地下浴室設淋浴間及向海按摩浴缸。
露台空間大，有餐枱，一張雙人搖搖床及同個海連成一線嘅泳池，泳池設計細心，加咗個半躺嘅位置讓客人可以浸住水望吓星空，於天朗氣清夜空欣賞一下香港少有嘅銀河，特別浪漫！
至於pantry就設於樓梯旁邊，除咗有minibar，仲有個超大雪櫃及放咗超過15支酒嘅酒櫃，pantry內嘅全部食品飲品都已經包括於全包套餐內，每日補充兩次，喜歡飲酒嘅朋友可以慢慢享受。
套房2/F係主人房，床頭對正無敵海景，亦有露台，2/F比下層海景更開揚，從高一層角度觀賞海洋生物比較容易，雖然同個海距離遠咗，不過多一個欣賞海洋嘅私人位置選擇當然受客人歡迎。呢一層都有浴室，設淋浴間，廁所及雙人洗手盆，方便客人唔洗又上又落。
除咗Ocean Suite，仲有單層嘅Ocean Villa，房間比Ocean Suite細但設備都差不多，露台無泳池，想游水就可以直接落海，呢邊海係一個lagoon(潟湖)，比Ocean Suite嗰邊嘅海洋淺水，而且係沙底，比較適合水性較差嘅朋友，不過如果喜歡親親海洋生物，喺自己房間一跳落水就睇到珊瑚嘅話，就會入住Ocean Suite比較好！
活動方面，基本上一般水上活動如風帆、水上電單車，帆船都有；另外仲有一連串娛樂活動，健身室及kids’ club，一家有大有細都可以搵到自己鍾意嘅活動，讓整個馬爾代夫之旅更歡樂、更難忘！
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記