馬爾大夫又有好介紹
大部分馬爾代夫嘅酒店都以”奢華”作賣點，酒店設計都較為富時代感及現代化，較具酒店感覺。今次我哋介紹嘅Gili Lankafushi Maldives就同其他馬爾代夫酒店有少少唔同，酒店希望將奢華嘅定義拉闊，讓客人可以自己定義屬於佢哋自己嘅”奢華”：無論係同心愛嘅人相處丶返到家一樣嘅歸屬感丶完全私人空間丶一杯無語倫比嘅咖啡丶一本書，甚至只係一個遠離現實嘅機會⋯ 希望客人嚟到就好似回家一樣感覺舒服自然！
今次參觀Gili Lankafushi，我哋早一晚已經到達馬累，喺budget hotel住咗一晚，第二朝去碼頭上船出發去目的地Gili Lankafushi，船程大約25分鐘，船上有有機飲品提供，亦會向客人派鞋袋，等大家可以準備開始呢個悠閒假期。
上到島，管家Mr. Friday就同我哋check-in，呢度check-in用嘅儀器好先進，佢哋用一把狀似間尺嘅scanner嘟一嘟就搞掂??
而Mr. Friday之後亦邊行邊介紹酒店嘅服務同設施，我哋首先留意到呢度嘅單車好特別，係用竹造，配合酒店嘅環境。Gili Lankafushi四周環境比較原始，俾人一個＂魯賓遜歷險＂嘅感覺，係一個未被過度開發嘅世外桃源！
我哋今次入住Villa Suite，係酒店最basic嘅water villa，全酒店有24間。
全間villa都以環保物料興建，屋頂都鋪上茅草，房間內嘅裝飾冇我去過嘅酒店咁新穎，比較重馬爾代夫傳統色彩，但當然一樣舒適丶乾淨。
房間以open air設計，意思係全個房間嘅窗都可以被打開，同出面嘅海洋融為一體，酒店鼓勵住客多享受大自然，所以特意喺客廳唔安裝冷氣，其實將客廳嘅窗全部打開之後，根本唔需要開冷氣已經好涼爽，陣陣海風吹送到客廳每一個角落⋯
入到嚟好有回家嘅感覺，奢華得嚟唔造作，感覺好自然。另外，房間嘅面積（未計露台）已經有2100呎，客廳、房間，同浴室都好寛敞，堪稱係全馬爾代夫最大嘅water villa！
房間內設備當然一應俱全，Bose音響設備丶Wi-Fi丶咖啡機，衛星電視等全部都有。而我最鍾意個浴室，?面嘅窗全部可以打開，讓客人可以同出面嘅大海零隔膜；另外仲有個以玻璃磚砌成嘅淋浴區，方便住客浮潛完可以直接沖身，而呢個area亦都係有遮擋嘅，唔洗擔心俾人見到。
Villa suite 嘅露台有兩張網床，亦有太陽椅，空間十足。villa下面嘅潟湖比較淺水，我哋當日水退時水深只到小腿，對唔識游水嘅朋友嚟講喺度玩水都幾好；而酒店都好細心，佢哋喺由露台落海嘅樓梯最低嗰幾級加咗防跣板，防止住客因踩到梯級上嘅青苔而跣到??
其實villa係有兩層嘅，我好鍾意呢度嘅天台，因為空間好大，除咗有張大梳外，仲有枱櫈可以俾住客喺度邊享受食物邊欣賞夜空。
我哋今次都有機會參觀埋另一種房間類型Crusoe Residence，全酒店只有7間，佢比villa suite大500多呎，每間都係獨立建於印度洋上，換言之，你每次出入都要坐船返去，你可以選擇自己揸或者call人嚟接你，感覺好與別不同㗎！
Crusoe Residence嘅客廳比villa suite更大，客廳中間有塊長方形玻璃地板讓住客隨時睇到海底，而且有空調設備，方便客廳變換成另一間睡房。
另外，Crusoe Residence每間都有個私人水上吊床，即係你可以游去海中心嘅吊床瞓個晏覺，我真係好想試吓，感覺應該超爽呀！
酒店經理亦介紹咗另外一種房型Gili Lagoon Suite，只有5間，位置最近浮潛區，房間配置同Villa Suite一樣，但係都有私人水上吊床，所以都好受歡迎。
參觀完房間，係時候去試吓酒店餐廳得唔得～
主餐廳Main Restaurant係沙灘上，開放式設計，住客可以喺樹蔭下用餐，環境舒服。我哋喺Main Restaurant試過早午兩餐：早餐我哋試咗煎雙蛋同egg benedict，味道可以；呢度都有D health drinks，幾好飲。而最驚喜係有VIP陪我哋食早餐！
午餐係semi-buffet，只選擇頭盤同沙律任食US25，要埋一個main course就US38。
有機沙律菜鮮甜可口，main course係以炸蕃薯條作伴碟嘅呑拿魚扒漢堡，我第一次食吞拿魚扒，7成熟，軟淋淋都幾好味，而且個炸蕃薯條甜甜哋香脆可口，比平時食開嘅薯條好味，讚！
Main Restaurant晚餐係buffet，逢星期二係亞洲街頭美食做主題，而星期五就係地中海主題。
除咗Main Restaurant，仲有間日式餐廳By The Sea、提供輕食嘅Overwater Bar同埋食雪糕雪條嘅Fini Foni！雖然Fini Foni嘅雪糕雪條唔係免費(每杯大概US6-8)，不過雪條嘅味道好特別，有cocktail味道(有酒精)，可以一試。
由於時間關係，酒店活動我哋只參加咗浮潛導賞。未嚟之前我哋一直以為呢間酒店冇珊瑚區，但原來呢度都有兩個珊瑚區，一個喺One Palm Island附近，一個喺spa centre對出位置，呢度駐場嘅海洋生物學家兼浮潛教練話spa centre個位少D珊瑚但多D魚，我鍾意睇珊瑚多D，所以最後佢帶咗我去One Palm Island 嗰邊。
我帶住GoPro同我一齊落水，短短15分鐘我已經認識咗十幾種海洋生物，每見到一種生物，教練就指俾我睇示意我影低，之後上水再講解，我好enjoy整個過程，除咗因為海底世界好靚，同教練嘅互動亦令我認識咗海洋更多，印象好深刻?? 不過唔一定落水先多嘢睇，行吓都遇到魔鬼魚 !
其他酒店設施當然包括spa、各種excursions及水上活動等，由於酒店嘅地理位置關係，附近嘅水域係好適合滑浪，酒店同一間專業滑浪公司合作，為住客提供各類私人或小組滑浪教學，就算小朋友唔識都唔緊要，嚟到即學即玩冇問題！
鑑於有好多客人玩到唔捨得走，酒店有D garden bungalow係專供已經check out嘅客人免費入住直到佢哋離開個島為止，呢個安排真係好好，難怪Gili Lankafushi被2018 TripAdvisor Traveller’s Choice Awards評為馬爾代夫No.1酒店及全球五大最佳酒店啦！
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記