馬爾大夫又有好介紹
美國酒店集團Conrad嘅酒店大家應該唔陌生，今次我帶大家參觀一下Conrad Maldives，睇吓呢間擁有全球第一間水底餐廳嘅五星馬爾代夫酒店，當年一開業就震驚全世界，到今年2019年仍然令人驚喜，因為佢剛剛開咗全世界第一間水底套房The Muraka！
Conrad Maldives Rangali Island於2004年已經喺馬爾代夫開業，不過當時叫Hilton，2007年先改為Conrad繼續運作。酒店位於South Ari Atoll，距離馬累機場只有30分鐘水上飛機機程，全間酒店由三個島組成，其中兩個島係沙灘屋及水上屋分別嘅所在地，島與島之間以橋連接，往來可以步行，坐buggy或者坐5分鐘dohni船。
Conrad嘅高質餐飲令到訪嘅客人都回味無窮，酒店嘅half-board package包括早餐及晚餐，而家我先向大家介紹一下酒店嘅餐飲服務，一共11個供應餐飲嘅地方，我哋試過其中7個，會逐一同大家分享一下：
1）Atoll Market係主餐廳，供應自助早餐，食物選擇性多，食物分門別類放於唔同區域，例如亞洲區、日本區、意大利區，燒烤區及麵包廊等，食物以新鮮鬆軟麵包最吸引，難得自助餐都食到熱辣辣嘅麵包。如果一家人或者一班朋友，嚟Atoll Market食早餐就最啱。
2）Vilu Restaurant & Bar係另一間供應早餐嘅餐廳，一望無際舒適環境適合愛侶慢慢嘆，半自助形式可無限制單點ipad餐牌上美食，亦可稍微調較內容，附相嘅ipad menu實在吸引，我哋見到樣樣都想食，送到枱上嘅美食精緻非常，令人賞心悅目，味道亦好好！之不過如果早上參加咗浮潛活動，嚟Vilu食早餐就唔多適合，皆因餐廳位於另一邊需要坐船過去，而且食物烹調需時，要享受一個早餐都可能要兩個鐘。
另外Vilu亦有晚餐食，晚上餐廳氣氛好好，我哋試咗外脆內淋嘅鮮味帶子、馬爾代夫龍蝦，嫩滑多汁嘅西冷扒同朱古力撻配柚子雪糕，所有味道都唔錯。
3）Rangali Pool Bar位於主泳池邊，供應午餐，晚餐及雞尾酒，有live music，好多喺泳池玩緊嘅客人會喺度叫杯飲品或小食，食物及服務無其他餐廳咁令人深刻，中規中矩，最令人欣賞嘅都係麵包。
4）Ufaa by Jereme Leung供應由香港星級廚師主理嘅中菜，係馬爾代夫極少有嘅美味中餐，我哋喺馬爾代夫試過好多中餐，全部都唔多好食，今次呢間居然令我哋好驚喜！餐廳主理Jereme Leung於郵輪及世界多個地方嘅酒店都有餐廳，喺2014年創立首間喺Conrad Maldives中菜館，雖然Jereme無長駐，不過佢一年會兩次上島確保餐廳質素，佢嘅徒弟亦長駐喺度，所以食物可以咁高質。我哋叫咗紅油抄手、蟹粉小籠包，炒龍蝦球及蝦球伊麵，全部都令人再三回味。呢度亦有提供麻雀卡拉ok套餐，好適合鍾意熱閙嘅香港人！
5）Sunset Grill位於海中央，獨立設計座位平台一個一個伸出海上，喺度用餐可以欣賞日落美景，感覺浪漫私人。呢度嘅肉類例如羊架及羊眼肉做得特別出色，甜品亦都非常唔錯，夕陽時分與最愛喺度飲嘢談心再用晚膳，醉人難忘！
6）全酒店最矚目焦點Ithaa水底餐廳，當年耗資500萬美金興建，雖然座位無想像中寛敞，但落到去的確令人興奮，感覺奇妙！
Ithaa全天侯供應早、午、晚，下午茶及雞尾酒會，四道菜午餐約二百多元美金一位，七道菜晚餐約三百多元美金一位，各用餐時間為兩小時；想經濟少少感受一下水底用餐，可以享用一小時嘅下午茶或雞尾酒會，US80一位。難得嚟到馬爾代夫，又點可以錯過嚟Ithaa潮聖，打一個卡！
7）Beach Dining Events唔係一間餐廳，佢係喺沙灘上嘅特別節目，每逢星期一，酒店附近小島嘅居民會嚟到為遊客舉行一個馬爾代夫之夜，喺沙灘上搭建一D帳篷擺設馬爾代夫傳統特色食物招待客人，亦有椰子葉編織示範及傳統馬爾代夫舞蹈表演，氣氛一流，喺度感受到當地文化，體驗生活，非常有趣！另外星期三都有Fisherman’s Barbecue及星期六有Champagne & Lobster Night，確保嚟到嘅客人一定有機會感受傳統文化。
睇完Conrad Maldives部分餐飲服務，相信大家都覺得好豐富，而呢度嘅住宿又點呢，其實Conrad嘅大部分沙灘屋已經全新裝修完畢，所以當我哋到訪時剛剛可以入住到全新Deluxe Beach Villa，而位於另一個島嘅水上屋會於2020年局部進入翻新工程，相信2021年全島就會開始新一頁。今次我哋主要參觀咗三種房，等我逐一介紹吓。
Deluxe Beach Villa剛全新裝修，每間房都依據地形設計，所以露台部分都有D分別，泳池有D係長型有D係圓形。房間設計獨特新穎，180度落地玻璃，通透光猛，而花園內嘅涼亭擺放咗雙人床及吊椅可以休息吓睇吓書，寧靜舒適。我對呢間有3230呎嘅沙灘屋就無乜挑剔，相信喺網上睇到話Deluxe Beach Villa又細又舊嘅評價應該係講緊裝修前嘅沙灘屋。
Water Villa曾獲”Maldives Leading Water Villa Resort 2016″，面積約1000呎，裝修佈置富傳統馬爾代夫特色，於寫字枱下有玻璃地板，房間內所有梳化都向海，露台設有按摩泳池，對出海域係沙底，游水一流。如果你喜歡傳統設計，呢間房會好啱心水。
Premier Water Villa面積有1700呎，入到去嘅感覺比想像中嘅1700呎大。打開大門經過玄關走到偏廳，放咗一張V型大梳化；浴室內設置咗一個嵌入地板內嘅雙人按摩浴缸，浴缸兩邊都係落地玻璃窗，感覺前所未有嘅無拘無束。露台放咗張雙人daybed及兩張沙灘椅，泳池都非常大，感覺奢華！
作為”Best Luxury Family Resort, Continent Winner, World Luxury Hotel Awards 2017″，Conrad嘅活動多姿多采，除咗有免費活動俾3-12歲小客人嘅Majaa Kids’ Club，仲有專為大小客人而設嘅多項水上活動，最特別就係玻璃底船，想私人浪漫可以包船出海，價錢都算係負擔得起嘅。
呢度嘅spa係”Best Private Island Spa & Hotel Spa, Haute Grandeur Awards 2017″得主，當然值得一試，三間擁有玻璃地板嘅水上spa房讓客人邊做spa邊欣賞海底世界，身心重新得力。
Conrad Maldives嘅高質食物可謂酒店最大賣點，加上集團品牌服務一向有保證，酒店有一定吸引程度????????如果想舒舒服服享受一個傳統馬爾代夫美食之旅，Conrad Maldives係一個好好嘅選擇！
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記