馬爾大夫又有好介紹
有人話馬爾代夫只有陽光海灘無景點無乜其他玩樂設施，日日只有水上活動及飲飲食食，兩三日就會覺得悶…而我馬爾大夫就話，其實只要妳揀一間活力無限嘅渡假村，你嘅馬爾代夫假期就會截然不同，無論係浪漫二人蜜月遊、溫馨家庭親子遊，抑或良朋知己歡聚遊，都一樣歡樂無窮！
今次介紹嘅大型渡假村Kandima Maldives就係其中一間活力四射嘅馬爾代夫渡假酒店！Kandima於2017年4月開幕，為Pulse Hotels & Resorts旗下酒店，貫徹集團宗旨，主要招待歐洲客人嘅Kandima時尚整潔，活力充沛，以人為本！
呢個島位於Dhaalu Atoll上，係馬爾代夫內數一數二嘅大島（全島長7km！）亦係一個天然島，由馬累出發只需要坐45分鐘水上飛機或30分鐘內陸機加20分鐘快艇就到。
島上已經有茂盛嘅園林植物，設施及餐廳多，馬爾代夫最大嘅kids club都喺度。因為面積大關係，島上嘅交通唔係其他酒店用嘅buggy，而係可以自由上落嘅循環巴士，客人亦可以租單車四圍去。
我哋感受到呢間酒店的確同其他馬爾代夫酒店有所不同，住客都好似忙著享受活動，唔只係曬太陽休息或者玩水上活動咁單調。我哋一行六人喺Kandima一共住咗3晚，雖然冇特別參加水上活動，但享用咗唔少設施及餐廳，以下首先為大家逐一介紹。
首先一定要介紹全長101米嘅無邊際主泳池，為全馬爾代夫最長，分為淺水區及1.2米深水區，池中更有張大梳化俾客人休息飲嘢食嘢，環繞著泳池嘅其他地方亦都有好多位俾客人坐，環境好休閒舒服，泳池對出係酒店嘅A級私人沙灘，沙灘旁邊有間喺馬爾代夫少見嘅廉價便利店Deli，客人玩玩吓想買D零食、蛋糕或叫杯咖啡，喺Deli只要幾蚊美金就買到，非常方便抵食，唔洗又坐低喺餐廳高消費。
Kandima除咗有個大泳池，佢嘅Kids Club “Kandiland” 亦係馬爾代夫最大，歡迎所有4-12歲小客人！室內部分有各種較靜態嘅活動，每日活動時間表都會唔同，好似繪畫、氣墊球、烹飪班、修甲⋯
室外就有大彈床，攀石及每個小朋友見到都興奮嘅嬉水樂園，小朋友嚟到真係玩10日都唔夠????我哋住幾日都見到好多有1-7歲左右小朋友嘅家庭，大人玩樂時可以放低小朋友喺kids club，自己輕鬆一下，各自各精彩！如果你嘅小朋友未夠4歲都唔洗擔心，你都可以付費俾小朋友入kids club玩，kids club開放時間過後（8pm），如果仍需要酒店員工幫忙照顧，付US$20就可以請員工到房間幫手睇住。
想玩水上或水底活動，無論係想尋找速度及刺激，抑或悠游欣賞海洋，去Aquaholics就啱唒！Aquaholics每日免費提供兩節到house reef浮潛活動，亦會為客人提供收費浮潛課程，讓本身唔識游水嘅朋友可以先於3米深嘅試水缸學一D技巧，再出海到house reef以外嘅浮潛點，輕鬆放心自在欣賞海洋世界。如果想嚟到參加PADI潛水課程嘅朋友，預早向酒店報名，酒店更可以讓客人出發前先上5小時網上理論課程，去到就可以直接落去試水實戰，慳返唔少時間㗎！我覺得Aquaholics嘅服務都幾細心，特設試水缸俾客人先學習技巧，幫助佢哋於落海前清楚自己狀況，排除恐懼，而且出海潛水時最多只係一位教練對四位學生，照顧比較貼身。 而其他水上活動，如獨木舟、風帆、滑水、香蕉船，kiteboarding或wakeboarding，全部齊備，喺呢度要接觸海洋，真係有無數個方法。
有健身習慣嘅朋友嚟到渡假當然都會想繼續健身，全年無休嘅BURN Fitness Centre就係目的地！呢度有多種唔同類型嘅健身班，Yoga、boxing，Pilates⋯⋯令客人保持身體狀態又玩得開心！女士特別嚮往嘅EsKape Spa環境舒服，welcome drink薑汁蜜糖凍飲非常清新，幾好味！療程就一般水準，勝在價錢合理。
酒店內其實有一個馬爾代夫少見嘅天然湖，因為浪拍打嘅關係，海水都被打入湖裡面，所以湖內其實係有咸水魚，但呢D魚未必可以適應出面海水，酒店冇再將佢哋放返入大海，因此每日都有餵湖魚時間。
湖邊有間KULA Art Studio，環境優美，可謂馬爾代夫唯一，好適合喜歡靜靜渡假嘅朋友；Studio裡面有畫廊師教客人畫畫寫生及手工藝製作，畫得好仲可以放喺度賣，十分特別！
除咗特定活動設施，酒店定期都會舉辦唔同國家節慶活動，氣氛熱鬧！為咗令客人可以喺Kandima放心玩樂，呢度仲有in-house嘅醫院，配備與時並進嘅醫療檢查器材如超聲波機、X光機及減壓鎗，亦有駐島德國醫生、護士，牙醫及潛水安全人員，萬一有客人受傷，或者小朋友唔舒服，都可以確保客人第一時間得到適切照顧，唔洗咁擔心。
餐飲方面，Kandima共有7間餐廳：
1）主餐廳Zest：供應早午晚三餐，因為近我哋住嘅Aqua Villa，所以我哋食咗共4餐早晚餐。Zest位於沙灘上，環境休閒舒適，香辣食物頗多，有泰式咖哩、摩洛哥辣食，印度咖哩等；另外有燒魚、燒牛肉、燒肉丸及雞槌，中菜就有炒菜及雜菜湯麵，冷盤就比較少，不過都有壽司，生果及沙律…
仲有kids corner，俾小朋友一邊睇電影一邊慢慢食，差D連我哋都想坐低邊睇邊食。Zest亦都有Theme Night，我哋就食過以”月圓之夜”為主題嘅自助餐，食物都造成肉丸形，圓圓的代表月圓，都幾得意。
2）主餐廳Flavour：同Zest供應嘅食物大同小異，位置喺碼頭附近，佈置就係西式餐廳一樣。食物質素同Zest一樣，10分滿分我哋會俾7分。
3）Smoked：設開放式廚房嘅燒烤單點餐廳，位於水上屋附近，有室外及室內座位，環境好好，令人滿意。
4）Azure：沙灘特色餐廳，午餐主要供應健康食物，包括無乳糖及無酒精食物，亦有素食及非素食餐牌俾客人揀。
我哋喺Azure食咗一餐健康午餐，前菜試咗鷹咀豆湯及好大份嘅有機黑藜麥沙律，湯出乎意料地新鮮香滑，沙律就有牛油果緣葉乾果配蘋果醋，味道出色一D都唔寡，大家都讚好味。主菜試咗望落平平無奇嘅蕃茄長通粉及安格斯牛肉，長通粉軟硬度適中，一D都唔平平無奇；而牛肉嘅汁都好特別，有紅酒感覺但其實係用焗芹菜根煮嘅，健康美味，令人驚喜！整體來說，Azure係一間令人好舒服嘅綠色餐廳，推薦大家去試試！
5）Sea Dragon：香港人去到馬爾代夫，可能未必會想食中餐，我哋喺其他酒店亦試過食中餐多次失望，但呢間馬爾代夫出曬名嘅大型中餐廳Sea Dragon就一定要試！
未嚟之前，我已經聞說有明星話每次到馬爾代夫都一定要嚟食，今次親身試過後，真係食過翻尋味。 餐廳嘅時尚高格調中國風裝修甚至氣派，三面玻璃直望印度洋，樓底好高，加上一條氣勢磅礴嘅龍，令人眼前一亮！
Sea Dragon嘅主廚James Liu係餐廳嘅靈魂人物，呢位劉大廚曾於杜拜亞特蘭提斯酒店任主廚，用心製作美食俾客人，點心比香港嘅頂級酒樓優勝，海鮮就更加唔洗講！
呢度雖然有魚缸養海鮮，但原來海鮮被漁民打撈上嚟會一直喺海入面養，直到魚缸差唔多被清空先會放D上去養，所以全部海鮮都特別肥美生猛。
大廚以啱香港人口味嘅方法炮製海上鮮俾我哋，喺香港從來冇食過清蒸龍蝦，估唔到喺馬爾代夫會食到。龍蝦好新鮮，又爽又甜，蘸上薑蔥豉油就已經鮮甜無比！大家都對呢間中餐廳有讚無彈，無論中國人定外國人都一定喜歡！
6）Aroma Cafe：鍾意飲咖啡嘅朋友，推薦你到位於KULA Art Studio旁邊嘅Aroma飲杯咖啡食件西餅。呢度嘅蛋糕以雞尾酒命名，配上裝咗雞尾酒嘅試管，可以將酒注入蛋糕內一齊食，幾特別。
Maccorn嘅味道唔太甜，幾好味；凍咖啡味道亦與別不同，味道淡又清新，好適合熱天飲用。如果想買個蛋糕慶祝大日子，Aroma都有得賣。呢間予人歐洲風情嘅咖啡店喺馬爾代夫實屬少見，喺度hea吓都幾寫意！
7）Beach Club：位於泳池及沙灘，有兩個大圓飛碟伸出海中心俾客人hea同打卡，可以叫杯果酒坐低，於DJ音樂下欣賞夕陽，放鬆休息，好多客人都鍾意喺度影靚相！
玩樂及飲食設施都介紹過喇，Kandima嘅villa又如何呢！
Kandima一共有四種水上屋，於島尾端嘅jetty就係其中三種水上屋嘅所在地，jetty前端係Aqua Villa（30間），中間係Aqua Villa with Jacuzzi（29間），後端係Honeymoon Aqua Pool Villa（2間），最後一種水上屋Ocean Pool Villa就係位於島中部嘅沙灘邊（18間）。另外加埋四種沙灘屋，整間酒店共有266間villa，今次我會主要介紹兩種水上屋：Aqua Villas with Jacuzzi及Ocean Pool Villa。
Aqua Villas with Jacuzzi面向潟湖，房間三面都係玻璃，光猛通透，浴缸亦係向海，室內裝修色調醒神，令人感覺充滿朝氣！
露台上嘅圓形按摩池好大，裡面有多個噴射出水位，兩個人一齊嘆就最啱。
如果一家四口其實都適合入住呢間villa，因為入面嘅梳化床可以打開，瞓多兩個小朋友都得。
Ocean Pool Villa面向印度洋，設計與Aqua Villas with Jacuzzi大致相同。呢間villa空間大D，整間villa都好光猛，連浴室都有兩面玻璃，所以坐喺馬桶上左面同前面都係海，令人好深刻！
因為面向大海關係，villa嘅私隱度好高，而且仲隨時會見到海豚出沒，我哋都喺villa內親眼見到，但係如果你想喺villa直接落海，住呢間villa就唔得啦，因為呢邊大浪，比較危險。
順帶一提，Kandima嘅房卡係一條防水手帶，非常方便，就算玩到幾忘形都唔怕唔見。另外，基於環保原則，villa內係無拖鞋及牙膏牙刷提供，如果客人忘記自備，都可以去便利店買嘅。
Kandima Maldives真係好啱充滿活力嘅夫婦及家庭，甚至三五知己一齊嚟，而且酒店嘅玩樂及餐廳收費亦比其他馬爾代夫合理大眾化，見到好多客人（包括我哋）都唔願留喺房間。
喺Kandima享受馬爾代夫假期果然一D都唔悶，歡樂無窮得嚟又悠遊自在，相信既喜歡熱鬧但又想享受休閒馬爾代夫嘅你，入住Kandima Maldives一定樂而忘返！
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記