Constance Hotels & Resorts係一間以毛里求斯為基地嘅酒店集團，於印度洋有一系列嘅奢華渡假酒店，每一間嘅主題都係希望客人嚟到可以享受貼近大自然，擁有一個滿足身心靈嘅假期。Constance 喺馬爾代夫有兩間渡假村，一間叫Moofushi，另一間叫Halaveli，今次我哋會介紹以高質餐飲服務及出色水療按摩為賣點嘅Halaveli。
Halaveli係一間浪漫迷人嘅5星渡假酒店，位於北Ari環礁上，從馬累機場坐30分鐘水上飛機就直接到達，今次因為我哋係從Moofushi過嚟，所以冇坐水上飛機，變咗坐咗30分鐘快艇。
Halaveli所在嘅島唔太大，行路兜一個圈只需約15分鐘，不過佢有嘅villa數目都唔少，一共有86間，其中有57間water villa及29間不同面積嘅beach villa，全部均設私人泳池、天台或露台，而其中嘅Family beach villa係有嬰幼兒同行家庭嘅首選，因為裡面有齊照顧幼兒嘅基本設備，如bb車、奶樽消毒器、bb床以及小孩睡房。
今次我同另一位同事出征，被酒店安排入住面積約1200呎嘅water villa，villa係沿住伸出海嘅jetty而建，無特別分日出/日落房間。
Water villa最適合愛侶二人世界，樓底高所以感覺特別寬敞，佈置簡約舒適，房間佈局分明，左邊係睡房，右邊係浴室，房間仲有個喺馬爾代夫酒店好少見嘅對流窗，打開窗同露台玻璃門空氣對流，清風送爽，唔洗成日開冷氣都好舒服！
房間有minibar ， 浴室有浴缸(備浴鹽）亦有淋浴間，無論浸浴定花灑浴都可以望到海。
露台設有扇形無邊際泳池，面積唔算大，浸住睇吓海都唔錯。
Halaveli一共有四間餐廳，就算只係half board嘅客人都可以到任何一間餐廳享用餐飲服務，只係menu上註明咗某一D貴價菜式係需要額外補錢先可以品嚐，所以如果客人入住3晩就可以安排每晚到唔同餐廳用餐。
1. Jahaz (with bar)：高雅主餐廳提供早午晚自助餐，氣氛悠閒，分室內室外用餐區域。我哋入住期間嘅早餐午餐都喺度食，最後一晚亦試過晚餐。早餐嘅食物款式唔多，但食物質素好高，新鮮好味????最推介嘅係呢度嘅pastry同麵包，款式多而且自家製，一有新鮮出爐就會推車仔出嚟送去客人度，好似飲茶賣點心咁，熱辣辣，好好味！自助晚餐同早午餐有D分別，每晩唔同主題，我哋入住當晩係意大利之夜，食物好正宗，沙律清新美味，意粉pizza全部熱辣辣，雞肉嫩滑，唔似一般自助餐嘅熱葷，一係焗住太耐一係唔夠熱????????另外仲有個cheese corner即場煮芝士，鍾意食芝士嘅朋友一定十分滿足。我同同事對Jahaz嘅食物環境都好滿意！
2. Jing (with bar)：呢間位於jetty中間嘅寧靜水上餐廳提供單點歐亞fusion菜式，係浪漫燭光fine dining晚餐好地方。我哋晚餐前出咗餐廳外嘅Jing Bar飲咗杯嘢，吹吓海風，好放鬆。
入夜後我哋入咗餐廳試咗一個3-course晚餐，試咗泡菜麵包、生蠔，燒吞拿魚及唔同部位嘅牛肉，全部食物都好新鮮及質素好高，如果要評分10分我會俾8分，可想而知我對呢度嘅食物有幾滿意????????
3. Meeru Beach Grill：呢間型格單點沙灘餐廳供應燒烤海鮮肉類，只有晚餐，雖然位於沙灘邊，但唔會嘈，而且氣氛輕鬆悠閒，所以二人絕對可以喺度享用浪漫晚餐。我哋試咗呢度嘅意大利tuna carpaccio及羊扒，味道都令人回味無窮，十分驚喜！值9分！
4. Kabila Sushi Bar：沙灘上的壽司吧，現場烹煮，只供應午餐，時間關係我哋無試到。
順帶一提，到Constance酒店餐廳用餐要注意，酒店規定男士唔可以著無袖衫入場(即背心)，不過如果著咗佢都會俾件Constance t-shirt你換，反而女士就無限制。
嚟馬爾代夫渡假，當然希望欣賞海底世界，潛水愛好者嚟到Halaveli一定興奮不已，因為呢度除咗有燦爛嘅珊瑚礁同魚群，鯨鯊都係呢一帶海域出現嘅常客，water sports centre及diving centre嘅教練團隊及水底攝影師都非常期待向客人介紹呢度嘅海洋生態。如果唔落海底，呢度嘅水上活動亦有好多選擇，可以盡情玩樂享受假期。
令人難忘的海底世界及幼白沙灘讓你和愛侶的浪漫假期錦上添花。
Halaveli以真摯貼心服務見稱，尤其USpa嘅療程非常出色！我哋試咗45分鐘嘅spa，果然高水準，不過價錢都唔低，一個療程大概US130，一分錢一分貨，如果你喜歡做spa就當然唔好錯過啦！
除此之外，酒店亦特設提供活動豐富嘅kids club，為小朋友安排節目，讓父母放幾日假，除咗兒童泳池及水上活動等，當中”Be a Constance staff”最富教育意義，小朋友可跟酒店職員了解酒店唔同部門嘅運作，角色扮演學做一個酒店職員，放假都可以輕鬆學習新知識，而小朋友可以扮演嘅角色都非常有趣
1)到餐飲部學習製作椰子雞尾酒
2)到spa centre學習做一個治療師，學習為客人洗頭吹頭、化妝、美甲、facial等，家人還可以做model給孩子做示範，享受一下
3)到潛水中心認識海洋及魚類，學習如何做一個潛水嚮導
4)學習馬爾代夫傳統舞蹈Bodu Beru，加入歡迎隊伍為賓客唱歌跳舞
呢項活動更係免費呢，當然入住前要先通知酒店安排啦！
除以上活動特設俾家庭，酒店亦為新婚夫妻特設honeymoon package，之後可額外要求酒店安排一些特別的節目，例如：
1. Couple massage and yoga classes
2. Private sunset cruise
3. Picnic / dinner on a sandbank – 只有你倆，於海中沙丘野餐或晚餐
4. Private Photoshoot – 為你們的浪漫蜜月假期留下美好回憶
5. Breakfast aboard a dhoni – 於傳統馬爾代夫漁船邊觀日出邊享用豐富早餐
6. Romantic dinner in the villa – 於露台享用配以香檳酒及醉人音樂的六道菜式晚餐
7. Dinner on the beach – 專人款待，現場音樂演奏及星光映照下享用七道菜式晚餐
Constance Halaveli適合蜜月旅行、舉辦婚禮及家庭旅遊，無論食物及四周天然環境都令人滿意，第一次到馬爾代夫旅遊嘅朋友都應該無投訴，唯獨曾經入住過馬爾代夫其他酒店嘅朋友可能會覺得Halaveli嘅設施有D失色，未夠與時並進，不過其實Halaveli將會進行袋修，希望為客人帶嚟更舒適更奢華入住體驗，到時一定令人感到新鮮驚喜！
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記