馬爾大夫又有好介紹
Constance Group呢個法國酒店品牌，應該好多港人都識，佢進駐咗馬爾代夫唔經唔覺都有9年，喺馬爾代夫一共有兩間渡假酒店，今次我哋為大家介紹其中一間Moofushi。
Moofushi位於南Ari環礁，係鬼蝠魟、鯨鯊及海豚洄游嘅路線，被公認為世界上最佳潛水及浮潛勝地之一，我哋由香港飛馬累機場到達後，喺酒店私人lounge休息兼等內陸機，之後坐咗約40分鐘水上飛機就到達Moofushi！
一上島做check in手續時，職員立即為我哋遞上拖鞋，提醒我哋：由呢一刻開始放低所有生活包袱，喺度好好嘆世界啦！
Moofushi係一間簡約奢華嘅渡假酒店，客人嚟到可以將假期計劃通通拋諸腦後，只係需要一心一意享受酒店為佢哋安排嘅一切，從優質酒類、精緻講究佳餚到豪華住宿及活動設施，所有都已包括在 All-inclusive Package 內，客人於早餐時段到達就可以開始享用早餐，晚餐時段離開亦可以享用晚餐後先離開，唔受時間限制。
酒店一共有 24間 Beach Villa，56間 Water Villa 及 30間 Senior Water Villa，房間設計崇尚簡約自然，配合 Constance 嘅時尚風格，令人感覺煥然一新。 Beach Villa（57平方米）最適合三人家庭，小朋友可以喺私人沙灘盡情玩樂，下晏喺陽台的吊床聽住海浪午睡一下，黃昏時分最好就係到沙灘欣賞日落。
今次我哋入住嘅係Water Villa，面積有66平方米，最適合夫婦。
雖然房間唔係好大，不過因為樓底高所以空間感好夠，唔會焗促。房間設戶外淋浴間，只有二人世界嘅專屬感覺，親密溫馨！
由villa露台落海浮潛其實都非常方便，因為villa呢帶嘅水域深淺適中，我哋雖然無落水，不過喺露台望落海都見到幾多魚，我見到好多住客都係villa附近浮潛，可想而知海底世界都應該幾精彩！
另外仲有Senior Water Villa，面積比Water Villa，有94平方米，比較適合4人家庭，當然兩夫婦鍾意寬敞D都可以㨂。
Senior Water Villa比Water Villa多咗個浴缸，咖啡機及beach bed。
入住Moofushi，一定唔可以錯過璀燦嘅海底世界，壯觀嘅housereef只係喺沙灘幾米以外，呢D housereef係奇妙迷人海洋生物嘅家，各式各樣生物多不勝數，包括魟魚（魔鬼魚）、獅子魚，紅鯛魚及鰻魚。
呢一帶水域清澈透明，能見度達20-25米，水流慢至適中，係潛水的最佳地點；專業潛水愛好者可探索達20多個潛點，就算潛水初哥亦有唔少優美潛點可以去發掘，附近能見到魔鬼魚嘅32個潛點由酒店出發只需半小時就可以到達，職員話最近嘅魔鬼魚棲息水域離酒店只係2-3分鐘船程，一到合適季節（12-5月），酒店嘅潛水人員就會留意到佢哋出現，客人只要孭樽落水跟教練出去就必定會遇到大量魔鬼魚，不過就算唔係合適季節，都好大機會見到，當然數量少好多啦！
Moofushi及周邊海域實在係一個寶藏，如果唔識潛水，要欣賞這片印度洋亦有其他方法，簡單嘅可以直接落水浮潛，想睇更多就一定要跟教練坐幾分鐘船出遠少少，或者於夕陽西下坐傳統漁船Dhoni追蹤海豚或出海釣大魚。除咗潛水，酒店嘅Bluetribe water sports centre 有齊所有非摩打推動嘅水上活動設施，客人可以免費任玩。
上面提及過，Moofushi嘅餐食都已經包括咗係 All-inclusive plan入面，客人可以於有兩間餐廳及兩間酒吧享用飲品食品：
- Manta – 奢華赤腳主餐廳，提供每天不同主題的自助早午晚餐，全包package也包括任飲餐廳內120款紅白餐酒, sparkling wine 及champagne，餐廳有品酒師駐場，為客人推介合適餐酒配合當日供應菜式。食物選擇唔算多，不過味道唔差，整體服務不過不失啦！
- Manta Bar – 飲品選擇豐富，包括招牌tropical cocktails及mocktails
- Alizee – 輕鬆優雅沙灘餐廳，綠樹林蔭，氣氛悠遊自在，供應新鮮烤魚烤肉，菜式精緻特別。客人可選擇於Alizee食單點午餐，酒店全包套餐亦包括客人於入住期間喺Alizee享用一餐單點晚餐。如果想試招牌菜，可以叫”品嚐menu”上嘅推介，有鵝肝醬，雞肉moouse及Tikka salad等，色香味俱全！
- Totem Bar – 全天侯供應輕鬆小食的沙灘酒吧，客人於每天4-6pm可以嚟享用下午茶，有免費雪糕食㗎！
另外，每逢星期三酒店會有一個沙灘酒會，讓客人同酒店管理層交流吓傾吓計，不過重點當然係試酒啦～
嚟蜜月遊嘅新婚夫婦可以買 All-inclusive honeymoon package，再額外要求酒店安排一D特別節目慶祝人生大喜事，例如：
- Moonlit dinner – 大廚為新人準備好最浪漫醉人嘅四道菜月光晚餐
- Cooking class – 你就係大廚，悄悄地為他／她煮一頓浪漫晚餐
- Cinefushi – 星光下欣賞一套電影，當然不可缺少爆谷雪糕小食雞尾酒
- Sunset cruise – 坐上傳統dhoni於柔柔海浪中搖曳，喝一口香檳，慶祝你倆新婚
- Lagoon breakfast – 在酒店最寧靜位置一邊浸泡喺印度洋一邊享用早餐
- Couple massage at U spa – 與另一半一邊欣賞印度洋，一邊享受按摩
Constance Moofushi非常適合想同最愛一齊探索精彩海洋世界及靜靜享受二人蜜月嘅愛侶 ! 酒店不時會有特別活動及優惠，想計劃蜜月，快D了解多D詳情喇！
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記