馬爾大夫又有好介紹
馬爾大夫致力為大家介紹馬爾代夫嘅豪華渡假酒店，今次嚟到我嘅第63間馬爾代夫酒店Faarufushi Maldives，親身體驗後向大家介紹一下酒店特色。
Faarufushi Maldives位於馬爾代夫北面Raa Atoll嘅聯合國教科文組織生物圈保護區內，屬於一間small luxury hotel，於2019年3月先開幕，係一個於馬爾代夫買少見少嘅全天然島嶼，四周植物及海洋生態都保持得好好。
從馬累出發到達酒店要坐45分鐘水上飛機或40分鐘內陸機轉10分鐘快艇，我哋一行四人第一日下午到達，一上島第一個感覺係十分私人、寧靜，雖然個前台冇予人一般奢華感覺，但上buggy環島遊時見到周圍好多樹，感覺好天然，令人放鬆心情，反而令我哋感受到一種嚟到馬爾代夫回歸大自然嘅奢華????????
管家逐一介紹設施，酒店一共有80間villa，33間沙灘屋及42間全部設有泳池嘅水上屋，其中3間水上屋係位於jetty盡頭嘅Ocean Suite with Pool，呢3間suite望到嘅日落景係全島最靚。
先詳盡介紹一下我哋今次住嘅Ocean Retreat with Pool，面積約1770呎，屋頂尖尖富傳統色彩，房間以暖木系色作主調，設計及佈置都非常配合呢間建於天然島嶼嘅small luxury hotel。
房間最令我欣賞嘅地方係兩邊以落地玻璃作牆，所以感覺好開揚同光猛，但唔需要擔心私隱度，因為房間之間距離遠，而且有窗簾可以拉埋，客人可以隨自己喜好開關。
浴室好大，設有浴缸及男女衣帽間，乾淨整潔；
露台上嘅泳池內擺放咗太陽椅，泳池旁邊就係落海嘅樓梯，呢邊嘅珊瑚唔多，如果要浮潛建議去水上酒吧嗰邊落水，或者選擇入住位於珊瑚區嘅Ocean Suite with Pool，咁就可以喺自己露台落水浮潛????????
Ocean Suite with Pool比Ocean Retreat with Pool大500呎，多咗間浴室，一個大廳同一張四人餐枱，泳池亦大D，不過太陽椅就唔係放喺泳池入面。呢間suite比較適合帶同仔女一齊渡假嘅家庭，因為夠空間可以加床。
如果想住沙灘屋都可以揀Beach Retreat with Pool，面積1900呎左右，設計同Ocean Retreat with Pool大同小異，只係浴室設於室外及有淋浴間，泳池亦特別升高方便客人欣賞沙灘海景，馬爾代夫嘅其他酒店沙灘屋泳池通常都係凹入地下，所以要浸喺泳池內睇海景係比較辛苦。
Faarufushi係一間提供全包式Dine-around All-inclusive Package嘅酒店，換言之入住酒店嘅客人可以於所有餐廳及酒吧用餐，包括所有註明全包套餐嘅餐酒及啤酒、房間內每日補充一次嘅mini-bar、yoga & meditation class，出海與海洋生物學家一齊浮潛認識海洋生物。
由於我哋入住期間馬爾代夫嘅天氣唔多穩定，所以我哋將注意力集中咗喺飲飲食食上，住全包式酒店就有呢個好處???? 四間餐廳及一間酒吧各有特色，主餐廳Iru供應早餐buffet，午餐及晚餐亦配合單點選擇，餐牌上嘅選擇多，假如客人似我一樣要求多多都唔洗驚，因為廚房都貼心，就算我要求某些食物多D少D都可以滿足到我????因為淡季緣故，我哋入住期間早餐只供應a-la-carte menu，如果入住率上升係早餐會以自助形式，不過一切都係酒店安排，事先係唔會預先通知。
午餐時間Iru會同隔離嘅池邊餐廳Sangu用同一個menu，午餐大概有8-9款前菜及主菜選擇，甜品選擇亦有好多，menu每隔日重複，想試多D食物可以叫兩個前菜亦無問題，只要食得落就可以啦！我哋分別試咗北印度小碟、吞拿魚他他、西冷扒，虎蝦及侍應推薦嘅甜品，全部都整得好好，最特別係北印度九小碟，可以試到多款唔同味道嘅北印度美食????????Iru嘅食物無論係賣相及味道方面都做得非常好，個人認為值80-90分！
晩餐一定要到signature restaurant Eclipse享用，因為呢間水上餐廳座位設計特別，每張枱都係獨立突出水上嘅半月形平台上，最適合與最愛一邊欣賞馬爾代夫日落一邊用餐，餐廳供應迎合亞洲人口味嘅歐陸菜式，富創意又美味。我哋試咗意大利生牛肉片，賣相特別令人難忘，當然亦好好味；主菜龍蝦新鮮彈牙，肉同殻已經被分離，就算女士食都可以繼續保持儀態！呢度員工嘅服務周到，見到我哋係華人就遞上中文餐牌，員工仲會於上菜時逐一介紹菜式及食材，所以我哋都食得好開心。
另外仲有多功能休閒聚腳點Athiri，呢度氣氛輕鬆，有爐端燒、鐵板燒及pizza等輕食，方便玩樂後過嚟坐低飲杯嘢休息吓。除咗食，Athiri嘅活動設施亦非常豐富，俾客人探索馬爾代夫嘅印度洋，基本上你諗到嘅水上活動呢度都有；另外仲有間休閒活動室，裡面有足球機、乒乓波及board game等，樓上亦有海景gym，想郁動玩樂一下最好就嚟Athiri！
講到玩，不得不提Faarufushi嘅獨特潟湖區，其實我哋一到埗管家已經提到水上屋對出潟湖區有一個5米深嘅「藍洞」，呢個「藍洞」唔係一個真藍洞，但喺度潛水已經可以睇到好多較深海域先出現嘅海洋生物，酒店希望嚟到嘅客人都可以親身接觸海底世界，專誠引入新潛水模式”Peter Diving”，讓無水肺潛水經驗嘅朋友都可以輕易地一嚐深潛滋味，聽到都覺得吸引呢！”Peter Diving”於1990年由一個西班牙家庭發明作玩樂用途，後來到2011年引入到船公司用作監測海洋之用，之後就開始於潛水界興起。潛水者只需要戴上面罩及重量腰帶，口咬連接浮於水面上氣樽嘅氧氣罩，自己唔需要孭住氧氣樽，就可以好似浮潛咁輕鬆潛入水底，因為有連住水面嘅助浮物幫助，潛水者唔需要自己控制浮力，簡單輕鬆，就算你從來未試過潛水，只要你唔驚就好易掌握！呢個潛水模式100%安全，小朋友8歲以上就玩得，每次一個滿氣嘅樽最多可以連接三位參加者，可潛落6米深大概30分鐘，越少人分享氣樽可以玩得越耐！相信你聽完我講都好想試吓，唔洗考牌就可以潛水，少好多負擔????酒店嘅全包套餐其實已經包括一次Peter Diving，性價比真係非常高，其他馬爾代夫酒店一定做唔到！
講咗咁多，仲未提到女士好期待嘅spa！Faarufushi嘅Nika Spa好特別，建於2/F，穩逸於椰子樹中間，每間獨立treatment room都係以椰子外型設計，房外設更衣室及浸浴，設計有別於一般spa，而泳池及steam room就開放俾所有客人。Nika Spa予人非常放鬆嘅感覺，樹林景觀唔焗促，幾個休息區讓客人自由自在咁休息，我哋兩位同行女士都好享受！
Faarufushi適合嚮往二人寧靜假期嘅夫婦，亦能滿足對食有要求嘅朋友，如果你喜歡潛水就更加唔洗講！而且員工笑容友善親切，讓我哋都感到賓至如歸，可以悠閒自在咁享受，“Pure experiences, Understated perfection”，Faarufushi Maldives確實係一間small luxury hotel！
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記