馬爾大夫又有好介紹
馬爾代夫又有五星級酒店全新開業，今次輪到Accor Hotel agroup最高檔次嘅Pullman Maldives Maamutaa Resort。Pullman嘅酒店遍佈全球，大家都可能入住過，唔知馬爾代夫嘅Pullman有冇預期中嘅5星級數，可以成為附近地帶嘅number one呢，今次等我哋親身體驗一下，為大家介紹！
Pullman Maldives Maamutaa Resort位於Gaafu Alifu Atoll，由馬累出發需要坐大概50分鐘內陸機，先飛到同一集團嘅Mercure Maldives機場落機，坐幾分鐘buggy到碼頭，再轉十幾分鐘快艇就到。
一上島就要經過一條較長嘅jetty就會到lobby，辦理check-in手續後我哋四圍睇吓，見到lobby附近有個頗大嘅天然湖，兩邊椰林樹影，仲有條吊橋貫通島嘅南北兩邊，除咗實用性，呢度係一個非常優美嘅打卡位，喺馬爾代夫實屬少見。之後職員都有帶我哋參觀唔同類型嘅房間，其中Ocean Pool Villa係最適合蜜月夫婦，我哋今次亦係入住呢種房，所以會詳盡介紹一下。
酒店嘅Ocean Pool Villa一共有53間，日出景觀，每間面積約1000呎，室內以現代化設計，比較有酒店感覺，與一般馬爾代夫酒店以木器嘅傳統設計有D唔同。
一推開villa大門，就係個向海嘅涼亭（chalet)，涼亭旁另一別墅先係房間，涼亭內擺放咗一張L型梳化及單座位藤椅，正前方就係有約7米長伸出海嘅無邊際泳池，泳池旁邊係露台位置，上面擺放咗一張餐枱及太陽傘，再有一張圓形雙人有蓬太陽椅，可以躺上去同最愛分享浪漫時光，比起一般太陽椅特別，二人可以糖癡豆❤️
由露台行入去房間，除咗張King size bed，右邊亦有一張長型梳化，對下有玻璃地板可以睇魚；房間嘅mini-bar有好多小食供應，紅酒白酒啤酒齊備，而且每日會補充兩次，非常豐富！mini-bar後有衣帽間，梳妝枱好大，方便女士使用，而衣櫃內有助浮衣供浮潛用，如果自備咗蛙鞋及mask嘅客人就唔使專登走去diving centre度借。
浴室設白色大型浴缸，亦有露天淋浴花灑，旁邊有個比其他酒店都大嘅網床，俾客人多個機會欣賞海洋。
嚟馬爾代夫想欣賞海洋，最直接梗係落水浮潛或孭樽潛水。我哋想試吓浮潛，所以去咗diving centre借用具，用具可以keep住用直到走之前一日先還，我哋喺入住嘅Ocean Pool Villa直接落水浮潛，當時係水退時份，水位退到大腿位置左右，但魚都幾多，而面向日落景觀嗰邊嘅房間珊瑚都好多，所以都可以欣賞到美麗嘅海底世界，鍾意浮潛睇魚嘅朋友一定唔會失望！
除此之外，客人都可以到water sports centre玩各種水上活動，全包套餐已經包括所有非磨打推動嘅活動，例如直立板，獨木舟及扒艇仔，其他磨打推動活動如underwater scooter，或者揸水上電單車出海釣魚浮潛，刺激又好玩。
每逢星期五，water sports centre亦有特備活動俾小朋友，讓佢哋有機會認識馬爾代夫天然環境多D，可能到沙灘認識貝殼或到淺水海域認識海洋，對小朋友嚟講會好有趣。喜歡靜靜欣賞大自然嘅朋友，就可以參加sunset cruise、Dolphin cruise，或者於月圓夜出海賞月，一樣可以享受馬爾代夫之美！
另外仲有一個娛樂區Skillz，裡面當然有好玩嘅娛樂設施，好似卡拉ok、桌上遊戲，電子哥爾夫球機及play station 4，就算只得兩夫婦嚟都可以過嚟have fun，令你倆浪漫假期更加精彩！
Pullman Maldives係一間全包型渡假酒店，讓客人可以隨便吃喝玩樂，無憂無慮享受假期，頭先介紹咗玩樂，而家當然要介紹吃喝。酒店內一共有三間餐廳兩間酒吧，三間餐廳供應完全唔同口味嘅菜式，員工服務都非常殷勤，佢哋除咗對食物質素要求高，亦非常在意客人對餐飲服務嘅滿意度，所以希望客人用餐後都可以填一填問卷，幫助佢哋繼續進步????????
– Mélange：all-day dining主餐廳，餐廳供應早午晚自助餐，食物以菜式分開四個區域擺放，有阿拉伯菜、中國菜，印度菜及法國意大利菜，中間就係甜品及雪糕區域，最出面就係水吧。我哋試咗阿拉伯及意大利菜嘅食物，味道唔錯，呢度嘅甜品有一般自助餐比較少有嘅cut cake，甜品賣相及味道都比其他酒店精緻出色！除咗擺放出嚟嘅食物，客人都可以按自己喜好要求廚師個別烹煮，我都額外order咗一杯水吧無供應嘅甘荀汁，水吧好貼心咁做咗兩杯俾我，可見酒店服務有幾重視客人。我哋對呢度嘅自助餐非常滿意，10分滿分我哋會俾8.5-9分，因為除咗食物質素高，員工亦非常主動招呼客人，佢哋專業地介紹餐酒，希望客人可以品嚐到最合適配美食嘅餐酒????????
– Phat Chameleon：有機素食餐廳，供應嘅係fusion菜，食物確係有D驚喜。前菜我哋點咗以黑松露伴碟嘅poached asparagus (水煮露荀)及ravioli(意大利雲吞)，味道出色！主菜有好好味king oyster mushroom大磨菇及不過不失嘅中式豆腐粉絲雜菜，最後甜品有dark chocolate tart及passion fruit cheesecake，呢兩個甜品都好好味，尤其個由新鮮熱情果+熱情果雪芭+熱情果啫喱造嘅cheesecake，10分值9.5分，完全無諗過素食可以咁好味！如果想二人浪漫晚餐，Phat Chameleon其實都好適合，餐廳外圍setting好浪漫，呢一餐素菜果然喜出望外！
– Sol Rising：早上6:30就開始為客人服務嘅all-day dining多國菜餐廳，全日無限供應酒水，午餐有意大利菜，晚餐就有阿拉伯及地中海菜。前菜我哋試咗味道醒胃嘅中東菜Fattoush Salad及土耳其Circassian chicken，主菜有grilled tuna及摩洛哥菜式seafood tagine！Grilled tuna有2吋厚，成塊牛柳咁大，外面燒香入面淋滑，魚味香濃，加上特別醬汁令成個菜式味道層次提升，滿分???????? tagine係一個慢燉菜，海鮮配一客小米，魷魚海蝦青口樣樣新鮮脆口，個汁亦非常野味，加上廚師又貼心專登煮咗個辣椒醬俾我想食辣嘅同事，美味至極！甜品方面，我哋就唔多識欣賞，所以唔多介紹啦。
– The Hub：渡假村嘅中心點，亦係於下午茶時段為客人供應輕食池邊酒吧，氣氛輕鬆自在，客人想過嚟隨便任叫都無問題。
– Saffron Affair：設美式桌球枱及桌上遊戲嘅海邊水上屋係欣賞夕陽最佳位置，5:30-7:30pm嚟到霸個靚網床位，點杯自己喜愛嘅美酒欣賞日落，令人如癡如醉！呢度酒類多不勝數，仲有賣雪茄及土耳其水煙，喜歡品酒嘅朋友於晚餐前嚟呢間bar就最適合
Pullman Maldives係一間綠化工作做得好全面嘅渡假村，比起馬爾代夫其他酒店多椰子樹，除咗藍天碧海，仲有綠樹林蔭，影相就靚好多。三間餐廳供應嘅菜式完全唔同，客人除咗可以跳出框框品嚐新口味，仲可以要求廚師根據自己喜好烹調自己喜歡嘅味道，服務體貼周到，照顧到來自世界各地唔同口味嘅客人，呢一點唔係間間5星級酒店都做到????????挑剔嘅我唯獨對小島附近水質有D意見，始終因為仲有地盤，所以會有D污染。總括嚟講，我哋會俾Pullman Maldives8-8.5分，相信於不久嘅將來，全個渡假村完工後，軟件同硬件都會做得更好，可以令Pullman Maldives成為附近嘅number one!
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記