馬爾大夫又有好介紹
純樸丶悠閒、浪漫丶精彩 － 就係Hurawalhi Island Resort！
位於Lhaviyani環礁上迷人小島嘅Hurawalhi Island Resort係一個既可讓人享受寧靜又令人興奮嘅世外桃源！呢間只招待15歳以上旅客嘅resort以一流珊瑚礁以及世界最大嘅全玻璃水底餐廳見稱，自2016年12月開幕自今一年，吸引咗唔少歐洲遊客遠度而來，作為馬爾大夫嘅我當然唔會錯過任何正酒店，今次我哋就過去親身感受一下Hurawalhi有幾正！
由馬累坐40分鐘水上飛機就到達呢個迷人小島，全resort有90間villa，當中有30間beach villa及60間ocean villa，每間villa都大概有1300呎，villa可再細分為日出丶日落丶附泳池及不附泳池，今次我哋入住不得不住嘅ocean villa with pool！
嚟到Hurawalhi點解一定要入住ocean villa？
皆因呢度嘅ocean villa下面嘅潟湖區對出海域有精彩燦爛嘅珊瑚礁同埋棲息喺嗰區嘅海洋生物！
Hurawalhi位於嘅Lhaviyani環礁附近水流、陽光，同清澈水質吸引咗二千多種魚類以及二百多種珊瑚喺度棲息，所以喺ocean villa出面海域浮潛見到海龜丶海豚，魔鬼魚同鯊魚一D都冇難度！
其實Hurawalhi?有三個浮潛區，第一個係沙灘島末段嘅淺層浮潛區，第二個係島中部嘅中級浮潛區，第三個就係啱啱介紹過喺ocean villa對出嘅高級浮潛區。高級浮潛區其實就係ocean villa下面嘅潟湖區游出D（潟湖區水深約到心口，可游泳及嬉水），魔鬼魚多出沒於呢一帶交配，專門研究魔鬼魚嘅海洋生物學家更喺Hurawalhi有個研究中心，亦有開辦教育工作坊向公眾宣揚保育海洋嘅重要性，以我所知，佢哋已經喺經常出沒於呢帶嘅400條魔鬼魚作標記，仲有未標記嘅未計，所以話住ocean villa90％係可以見到魔鬼魚㗎！
Ocean villa內嘅裝飾簡潔舒適，富現代感之餘亦同出面嘅印度洋互相輝映，露台有餐枱丶L形梳化同太陽椅，私人泳池都唔細，旁邊就係俾我哋落潟湖嘅樓梯。
而房間嘅配置當然一應俱全。由於係all-inclusive package，所以房間內嘅小食、飲品包括酒櫃?嘅酒都可以隨便享用，每天也會refill一次。
我哋都有參觀埋beach villa，其實beach villa都好正，露台一樣對正個海，同ocean villa一樣舒服！
講完住就講吓食～resort內有三間餐廳同一間bar，先介紹對住主島infinity pool嘅”CoCo Bar”，嚟呢度最好玩，因為呢間24小時營業嘅bar內除咗有live music仲有間活動室，裡面有乒乓波丶桌球丶彈珠機，食鬼機etc⋯
可以同其他酒店住客一齊玩吓，玩完又可以出去聽吓歌，欣賞寧靜中帶點熱鬧嘅馬爾代夫星空✨✨
CoCo Bar旁邊就係主餐廳Canelli，呢度提供精彩美味嘅自助餐，基本上早午晚三餐都會嚟～Canelli食物有好多選擇，當中包括貴價食材如生蠔、青口同鮮蝦，另外熱葷都有好多種類，而refill出嚟嘅食物都係另一款式，主題又成日有變化，仲有live cooking stations可以俾住客揀自己鍾意嘅食材即場叫廚師煮，所以就算食幾日都唔會覺得悶。
第二間餐廳係水上餐廳”Aquarium”，喺呢度可以食到海鮮同日式鐵板燒，不過就要另外付費（Package不包括），午餐價錢大概US70，晚餐US120-130，鐡板燒就US80左右，雖然要再俾錢，但係呢度個view真係超靚，坐喺180度全海景餐枱用餐，視覺味覺都超滿足！
由Aquarium 行落下，就係全世界最大嘅全玻璃海底餐廳”5.8″！餐廳喺水深5.8米嘅水底入面，餐廳職員帶我哋由水底餐廳上層入口行落去，又講解俾我哋聽要行幾多級落去，介紹餐廳設計，感覺好特別。
落到去，感覺非常震撼，大魚細魚喺我哋四方八面游嚟游去， 目不暇給！
除咗海底世界令人感覺新奇，餐廳提供嘅佳餚美饌也令人回味無窮！德國大廚曾經喺三間米芝蓮餐廳工作，四個course及七個course嘅午餐分別US190及US280，而晚餐都是七個course，US280。
咁食午餐定食晚餐會見到多D魚呢？其實都冇一定嘅，不過唔好以為夜晚個海會黑漆漆乜都睇唔到，晚餐時段由6:15pm開始，呢個時候仲有日照，可以欣賞到日間海底世界；7pm開始日落，日照漸少直至變成黑漆漆，海底大燈就會開著引D魚過嚟⋯⋯所以食晚餐就可以同時欣賞日同夜嘅海底，貴得有道理㗎！而且餐廳係fine dining，每道菜都相隔20-25分鐘，等食客有足夠時間慢慢品嚐??
至於Resort提供嘅活動有網球丶羽毛球丶足球、獨木舟丶風帆丶、沙灘單車(日租US10) gym丶yoga⋯⋯住客可以自己組隊同酒店員工隊鬥吓玩吓。
想同愛侶浪漫一下？resort附近有個沙洲，極高私隱度，付US220就會有船載你同愛侶去呢個Dream island度享受陽光與海灘（附小食飲品）
另外diving centre仲有d tour好似dolphin cruise、出海釣魚同睇鯨鯊etc，要幾精彩有幾精彩！
想享受純樸丶悠閒丶浪漫嘅精彩馬爾代夫假期，快D上http://www.travelchannel.com.hk了解多D詳情啦！
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記