馬爾大夫又有好介紹
不斷發掘馬爾代夫新酒店介紹俾大家一直係我馬爾大夫嘅首要任務，今次我要同大家介紹一間我到訪時只係開咗48日嘅全新酒店 Fairmont Maldives – Sirru Fen Fushi！
今次我哋好榮幸，係全球第一間旅行社安排到Fairmont Maldives參觀，酒店十分重視我哋，雖然有D地方仍然興建中，不過亦無損我哋對呢間酒店嘅好印象。
酒店與一眾出名酒店毗鄰，我哋由馬累坐水上飛機到達酒店，全程1小時30分鐘，飛程一半時於另一間酒店Chevalier Blanc Randehli停咗十幾分鐘入油，而我哋亦落咗地入咗個lounge度飲咗杯嘢，之後再起飛，大概45分鐘就到達Fairmont Maldives嘅jetty位置，可以直接上島。
上到島當然有welcome ceremony，然後就check-in啦！
初時我哋聽到話要坐個幾鐘水上飛機都有D怕會悶，但原來周圍風景都幾吸引！頭段我哋高飛(6000呎)，風景好廣闊好靚，入油後我哋就低飛(2000呎)，可以見到好多珊瑚礁，又另一番感受。
Check-in後我哋直接入房，酒店俾我哋住嘅係Grand Water Sunset Villa。
房間格調高級，樓底好高，面積2745平方尺，空間感十足；我最喜歡佢嘅露台，因為上面除咗有個19米長嘅泳池、太陽椅以及吊床外，仲有個都幾大嘅L型私人沙灘，住水上屋都有沙玩，多完美啊！
而個浴室亦都係非同凡響，浴缸洗手盤等以金銅打造，個浴缸仲比普通浴缸大成3倍，兩個人浸都好鬆動；洗手間鋪上玻璃地板，而淋浴間嘅三面對住都係鏡，咁樣沖涼感覺都幾震憾！
之後我哋都參觀咗Water Sunrise Villa，面積1991平方尺，係最基本嘅水上屋。
雖然面積細過我哋住嘅Grand Water Sunset Villa，不過我入到嚟覺得好有驚喜，感覺比較舒服，好適合我哋香港人??
房間設施方面同Grand Water Sunset Villa大致相同，露台有Grand Water Sunset Villa冇嘅水上網床(同埋依然有吊床)， 只是欠缺私人沙灘同洗手間嘅玻璃地板。
有小朋友嘅家庭可能會prefer住beach villa，呢度嘅Beach Sunrise/Sunset Villa必定係首選！
Villa喺沙灘盡頭嘅紅樹林區，椰林樹影，面積3843平方尺，面積大嘅私人泳池1.4米深⋯活動空間充足，小朋友一定玩到唔捨得走！
小朋友除咗可以喺villa裡面玩，酒店嘅kids club都超大！1/F有個大面積嘅網床，連住條滑梯sir落地下。
另外當然仲有好多各式各樣嘅玩具同電視電影節目等，加上kids club每日嘅活動表節目豐富，實屬名符其實嘅兒童樂園，包保小朋友忙到不亦樂乎! 小朋友有人幫忙睇住，兩夫婦可以去拍拖做個spa。 我哋都試過Willow Stream Spa提供嘅spa，成為spa centre嘅第2、3、4位客人?
我哋對呢間spa都一致好評，無論係spa centre嘅土耳其式裝修，定係spa centre內提供嘅浴袍拖鞋，都俾人一種高尚、舒適嘅感覺 技師之前都喺其他酒店工作，所以手勢都好好，而且都好細心咁留意我哋嘅需要，整體服務都超出我哋期望。
另外，酒店仲有一個橫跨整個島嘅直線泳池，呢個泳池視覺上將整個島分開一半，Fairmont嘅呢個泳池係全馬爾代夫第一個咁樣設計，確係特別。
酒店餐飲都做得十分出色，我哋早午晚餐都試過，先由早餐講起。
Raha Market Restaurant係食自助早餐嘅地方，呢度有幾個即場烹調站提供新鮮食物，包括供應有機果汁同新鮮沙律嘅Farmer’s Station、cold cuts及風乾肉類嘅Butcher Station、奶製品嘅Dairy Pantry，同新鮮麵包糕點嘅Baker’s Corner。
餐廳嘅所有食物都好新鮮，擺出嚟嘅都係好精緻，感覺全部都係經精挑細選後先放出嚟，所以大家都食得好放心。除咗以上食物，我哋都試咗煎蛋同egg benedict，個egg benedict雖然係細細個，不過一切開蛋黃就湧出嚟，味道滿意！
我哋都喺同一間餐廳食咗午餐，試咗日式加州卷丶越式牛肉米粉丶蒸魚丶馬爾代夫周打海鮮湯，同埋馬拉炒飯。最特別嘅係個加州卷，入面包住大大條皇帝蟹腳，而且賣相都好吸引；另外個周打海鮮湯我都特別推介，裡面嘅龍蝦肉新鮮彈牙，味道當然比一般嘅出色??
晚餐我哋就去咗仍未完工嘅日本餐廳Kata試吓日本料理。餐廳有兩層，地下嗰層係serve壽司以及爐端燒，上面2/F係日式酒吧，因為地下未完工，所以酒店喺2/F(即天台) set咗張枱俾我哋慢慢喺星空同新月下享受呢餐日式料理?我哋試咗呑拿魚手卷丶炸雞丶串燒牛及蝦，味道正宗亦合香港人口味，食材當然亦都係新鮮所以先咁好味啦！整體而言，酒店嘅食物都唔差，大家可以放心。
其他酒店設施唔多講，不如俾大家睇多D Fairmont嘅靚景啦～
———————————————————————————————————–
想知更多馬爾代夫酒店資訊 / 優惠，記得緊貼我們社交平台 ：
>> 免費下載 ebook電子書
>> 訂閱 YouTube頻道
>> Follow us @ : Facebook專頁 / Instagram專頁
>> 瀏覽 峰旅BLOG遊記